РФКП, хаҥас уонна национальнай-патриотическай күүстэр блоктара быыбар хампаанньатыгар дьоһуннук бэлэмнэннилэр. Россия бүгүҥҥү балаһыанньата хайдахтаах курдук ыараханын уонна кутталлааҕын чуолкайдык өйдүүбүт. Дойду иһинээҕи уһаабыт-кэҥээбит кризис тастан дьайар сүҥкэн политическай тыҥааһыны кытта хоһулаһар. Маннык балаһыанньаҕа президент быыбарын чиэһинэйдик ыытыы быһаарар суолталаах.
Биһиги бэйэбит кандидаппытын туруорарга олус эппиэттээхтик сыһыаннастыбыт. Павел Грудинин – уопуттаах салайааччы, үрдүк профессионализмын уонна булгуруйбат көрүүтүн бэйэтин үлэтинэн итэҕэтиилээхтик дакаастаата. Кини салайар Ленин аатынан совхоһа Россия сырьеҕа иэҕиллэр капитализмын ортотугар социальнай бигэ турук түөлбэтэ буоларын биһиги информационнай ресурсаларбыт көмөлөрүнэн көрдөрбүппүт.
Павел Николаевич производство салайааччытынан үлэлииригэр көрдөрбүт хаачыстыбалара дойдуну чөлгө түһэрэр үлэҕэ бигэ тирэх буолуохтара. Биһиги кандидаппытын идэлэрин толору баһылаабыт дьон, араас идэлээх специалистар хамаандалара өйүүр. Кинилэри Россия олоҕун-дьаһаҕын уларытарга дьулуһуу биир сомоҕолуур. Павел Грудинин 20 хардыыта – бэйэбит кандидаппыт быыбар иннинээҕи программатын биһиги кыттыһан киэҥ билиигэ таһаардыбыт.
Уопсастыба сонуннары киэҥник тарҕатар сириэстибэлэр быыбар иннинээҕи хампаанньаны кырдьыктаахтык сырдаталларын эрэйэр. Бэйэбит өттүбүтүттэн биһиги эмиэ аһаҕас уонна чиэһинэй күрэстэһии, кандидаттар программаларын хайдах баарынан тэҥнээн көрүү буолуоҕар эрэммиппит.
Ол эрээри бүгүҥҥү күҥҥэ диэри ыллыктаах кэпсэтии тахсыах сибикитэ ханан да суох. Ааспыт сыл бүтэһигиттэн биһиги кандидаппытын холуннарар-киртитэр информационнай саба түһүүлэр саҕаланнылар, РФКП официальнай сайабылыанньатыгар ону сорунуулаахтык утарда. Ол эрээри быһыы-майгы көнө илик. Ону ааһан Павел Грудинины утары үлэлиир информационнай ресурса ахсаана элбээтэ. Кинилэр үксүгэр кыра ычалаах “араҕас” хаһыаттар таһымнарыгар түһэн сымыйаны эрэ дойҕохтууллар.
Бу барыта үрүҥү хара, хараны үрүҥ гынан көрдөрбүт, ыллыктаах санаа түҥнэстибит, хоп-сип, холуннарыы баһыйбыт “дьалхааннаах 90-с сыллардааҕы” Ельцин таҥнастыы дуйдаах истиилин санаталлар. Сонуннары киэҥник тарҕатар федеральнай сириэстибэлэр, ол иһигэр көрөөччүгэ киэҥник биһирэнэр телепрограммалар уонна биллиилээх суруналыыстар, омсолоох үлэтинэн биллибит “Не дай бог” хаһыат таһымыгар түһэллэрэ сиэргэ баппат. Биһиги кандидаппытын утары аһаҕас контрпропаганданы ыыталлара бу туһааннаах быыбарга эрэ буолбакка, Россия Федерациятын быыбарын тиһигэр итэҕэли өлөрөр.
Биһиги кандидаппытыгар итэҕэйбэт дьон бары Ленин аатын совхоз куората хайдах олорорун кэлэн көрүҥ уонна ол туһунан кырдьыктаах репортажта оҥоруҥ. Кэлиҥ уонна “Грудинин миллиардын” көрүҥ – аныгы производствоны уонна инфраструктураны, оҕо саадтарын уонна оскуолалары, дьон олорор дьиэлэрин, сынньанар зоналарын. “Кыһыл директор” кистиирэ туох да суох.
Кирдээх ньымалары туттууга биһиги саҥа кэтиллибит буолбатахпыт, бу модун күүс туоһута буолбатах. Төттөрүтүн, маннык информационнай саба түһүү биһиги кандидаппыт үтүө аата күн-түүн үрдээн-үүнэн иһэриттэн куттаналларын туоһулуур.
Дойдуга “быраабылата суох онньууну” соҥнуулларын биһиги сорунуулаахтык утарабыт. Сокуоннаһы уонна аһаҕас уонна чиэһинэй күрэстэһии тыыныгар сиэрдээх политическай диалогу чөлгө түһэрэри модьуйабыт. Павел Грудинины хараардар хампаанньа булгуччу тохтотуллуохтаах. Былаас уонна сонуннары киэҥник тарҕатар сириэстибэлэр бэрэстэбиитэллэрэ хорсун санааларын киллэрэн, президент быыбарын ыраастык ыыталларыгар ыҥырабыт.
Г.А. Зюганов, РФКП КК бэрэссэдээтэлэ, Судаарыстыбаннай Думаҕа РФКП фракциятын салайааччыта,
Ж.И. Алфёров, РНА академига, Нобелевскай бириэмийэ лауреата,
Н.В. Арефьев, «Сэрии оҕолоро» Бүтүн Россиятааҕы уопсастыбаннай хамсааһын бэрэссэдээтэлэ,
Ю.В. Афонин, РФКП КК бэрэссэдээтэлин солбуйааччы,
А.А. Байбикова, «Дискурс» устудьуоннар тутулуга суох идэлээх сойуустарын салайааччыта,
Л.Г. Баранова-Гонченко, Россия Суруйааччыларын сойууһун хос бэрэссэдээтэлэ,
Г.М. Бенов, Сэбиэскэй офицердар норуоттар икки ардыларынааҕы холбоһуктаах сойуустарын КТК бэрэссэдээтэлэ,
Ю.Ю. Болдырев, публицист, уопсастыбаннай деятель, ПДС-НПСР бэрэстэбиитэлэ,
В.В. Бортко, кинорежиссер, Россия Федерациятын норуодунай артыыһа,
В.С. Бушин, суруйааччы, публицист, суруналыыс,
В.П. Исаков, РФ ЫЛКС КК бастакы сэкирэтээрэ,
Л.И. Калашников, РФКП КК Президиумун сэкирэтээрэ, чилиэнэ,
В.И .Кашин, РНА академига, РФКП КК бэрэссэдээтэлин солбуйааччы,
Н.В. Коломейцев, РФКП КК Президиумун чилиэнэ, Судаарыстыбаннай Думаҕа РФКП фракциятын салайааччытын бастакы солбуйааччы,
Б.О. Комоцкай, «Правда» хаһыат кылаабынай редактора,
И.И. Мельников, РФКП КК бэрэссэдээтэлин бастакы солбуйааччы, РФ Судаарыстыбаннай Думатын бэрэссэдээтэлин бастакы солбуйааччы,
Д.Г. Новиков, РФКП КК бэрэссэдээтэлин солбуйааччы,
Н.А. Останина, «Всероссийский женский Союз — Надежда России» Бүтүн Россиятааҕы уопсастыбаннай хамсааһын бэрэссэдээтэлэ,
А.Н. Савельев, «Монархическая Россия» партия бэрэссэдээтэлэ,
С.Е. Савицкая, лётчик-космонавт, Сэбиэскэй Сойуус икки төгүллээх Геройа,
О.Н. Смолин, РАО академига, «Образование – для всех» Бүтүн Россиятааҕы уопсастыбаннай хамсааһын бэрэссэдээтэлэ,
В.И. Соболев, генерал-лейтенант, «В поддержку армии, оборонной промышленности и военной науки» Бүтүн Россиятааҕы уопсастыбаннай хамсааһын бэрэссэдээтэлэ,
С.С. Удальцов, «Левый фронт» хамсааһын лидерэ,
В.И. Филин, ПДС-НПСР координатора,
В.В. Чикин, «Советская Россия» хаһыат кылаабынай редактора,
С.А. Шаргунов, суруйааччы, «Свободная пресса» Интэриниэт-портал кылаабынай редактора.