“Ханнык да 7,5 млрд солкуобай суох. Кини үс счетугар 35 мөл солкуобай кэриҥэ баара, олор сыаналаах кумааҕыга уларытыллыбыттара. Кэккэ СМИ-лэр бэҕэһээ сыыһа ааҕаннар, хас биирдии кумааҕы 37 мөл солк. сыаналаах диэн баран ону сыаналаах кумааҕы ахсааныгар төгүллээбиттэр, онтуктара 7,5 млрд солкуобай буолбут”, — диэн быһаарда.
“Кини 2017 сыл тохсунньутуттан ахсынньытыгар диэри чугас дьонун эмтэтэргэ омук бааннарыгар уурбут 37 мөл солк. харчылаах. Ити үп сыаналаах кумааҕыга кубулутуллубута, олор хас биирдиилэрэ буолбатах — суумалара холбоон 37 мөл тэҥ”, — диэтэ Ющенко. Онуоха Грудинин кыраныысса таһынааҕы счеттарын 2017 сыл тохсунньуга, ол аата Судаарыстыбаннай Дума 2016 сыллааҕы быыбарын кэнниттэн арыйбыта диэн өссө төгүл бигэргэттэ.
Быыбар Киин хамыыһыйатыгар дохуот, баай-дуол уонна сыаналаах кумааҕылар тустарынан чуолкайдыыр сыаллаах эбии бэриллибит сибидиэнньэлэргэ сигэнэн кэпсээбиттэрин курдук, Грудинин кандидатынан регистрацияланыан иннинэ омук бааныгар 14,4 мөл солкуобай кэриҥэ суумалаах счетун саппыта уонна сыаналаах кумааҕытыттан босхоломмута.
Тохсунньу 12 күнүгэр РФ Быыбар Киин хамыыһыйатын чилиэнэ Евгений Шевченко Грудинин ахсынньы 28 күнүгэр кандидатынан турарга докумуоннары туттарарыгар ааспыт алта сыл устатыгар дохуотун, баайын-дуолун, ону тэҥэ сыаналаах кумааҕыларын тустарынан сибидиэнньэлэри биэрбитин туһунан биллэрбитэ. “Бу докумуон ахсынньы — президент быыбарын аныыр туһунан быһаарыы ылыллыбыт ыйын 1 күнүнээҕи туругунан бэриллэр”, — диэн бэлиэтээбитэ. Ол түмүгүнэн Грудиниҥҥа быыбардыыр анал счетун арыйарыгар көҥүл бэриллибитэ.
«Тохсунньу 9 күнүгэр Грудинин бэрэстэбиитэллэрэ кандидатынан регистрациялыырга Быыбар Киин хамыыһыйатыгар докумуоннары, ол иһигэр дохуотун уонна баайын-дуолун чуолкайдыыр чахчылары киллэрбиттэрэ”, — диэбитэ кини уонна сокуон итинник чуолкайдыыр чахчылары киллэрэри көҥүллүүрүн ыйбыта. “Ити докумуоннарга омук бааннарыгар биэс счеттааҕын уонна уопсайа 600 устуука сыаналаах кумааҕы туһунан сибидиэнньэ ыйыллыбыта, — диэбитэ Шевченко. — Ону кытта тэҥҥэ кандидат омук бааннарыгар харчы ууруута суоҕун уонна омук финансовай инструменнарынан туһамматын туһунан биллэрбиттэрэ”.
“Омук бааннарыгар счеттара ахсынньы 28 күнүн иннинэ сабыллыбыттар этэ, ити эрээри баан иһигэр транзитнай счеттар диэн ааттанар счеттар бааллар, олор тустарынан клиеннэр билимиэхтэрин сөп, тоҕо диэтэр, ол баан иһинээҕи “куукуна”. Биһиги юристарбыт көҕүлээһиннэринэн ол үс транзитнай счету булбуппут, олор эмиэ биир да харчылара суох, сабыллыбыттар этэ, ол иһин кинини бүгүн Быыбар Киин хамыыһыйатыгар регистрациялаатыбыт, атын эбитэ буоллар регистрацияланыа суоҕа этэ”, — диэн Ющенко быһаарда.
“Оттон Грудинин Судаарыстыбаннай Дума депутатыгар кандидат эрдэҕинэ баар кыраныысса таһынааҕы счеттарын туһунан этэр буоллахха, болҕойуҥ: быыбар 2016 сыл балаҕан ыйыгар буолбута, оттон счетун кини 2017 сыл тохсунньуга арыйбыта. Предприниматель да уонна көннөрү киһи да быґыытынан кини кыраныысса таһыгар счету арыйар бырааптаах этэ”, — диэн быһаарда Ющенко. Оттон, кини этэринэн, Грудинин президеҥҥэ кандидатынан турбутугар, сокуон ирдиирин быґыытынан ол счеттар сабыллыбыттара. “Онон кини, ханнык да нуорма кэһиллибэтэҕин быһыытынан, бүгүн регистрацияланна,” — диэн политик бэлиэтээтэ.
“Биһиги кандидаппыт репутациятыгар туох да хоромньу оҥоһуллубата, биһиги быыбарга киирсэбит, барыта сокуон быһыытынан, Грудинин докумуоннарын барытын лупалаах бэрэбиэркэлээбиттэрин кэнниттэн президеҥҥэ кандидатынан регистрацияланна”, — диэн депутата түмүктээтэ.
ТАСС