Ил Түмэн аптарытыата күүстээх буоллаҕына, дьон былаас уорганнарыгар эрэниэ, итэҕэйиэ. Ил Түмэҥҥэ биир баартыйа сүрүннээн олороро сүтэн, икки-үс баартыйа тэҥҥэ аахсар буоллахтарына, үлэтэ үтүө түмүктээх буолуо. Бар дьон талбыт дьокутааттара сиэр быһыытынан мөккүһэн, араас санааны этинэр буолуохтаахтар.
Аны туран Ил Түмэн үлэтэ аһаҕас буолуон наада. Ыйга биирдэ буолар сүрүн мунньаҕын «Саха» НКИК нөҥүө аһаҕас эфиринэн өрөспүүбүлүкэ дьоно көрүөхтээх. Иккиһинэн, мунньах хас биирдии боппуруоһунан дьокутаат хайдах куоластаабыта көстөн иһиэхтээх. Билэргит курдук, дьокутаат оччуоттуу кэлэн баран, хой баһын туойуон сөп.
Холобур үүт сыанатын үрдэтиини өйөөбүтүм диэн баран, куоластаабытын көрдөххө, тыа сирин өйөөбөтөх буолааччы. Ил Түмэн үлэтэ, ким хайдах куоластыыра аһаҕас буоллаҕына, итинник сымыйалааччы суох буолуо. Дьокутаат норуокка туһуламмыт сокуоннар барылларыгар, бүддьүөккэ хайдах куоластаабытын бар дьон билиэхтээх.
Дьокутаат хас биирдии сытыы боппуруоска, буола турар быһыыга-майгыга санаатын биллэриэхтээх, сөптөөх боппуруостары туруорсуохтаах — экология боппуруостара, ыксаллаах быһыы-майгы кэмигэр, норуот сөбүлэспэт түгэннэригэр, дьон болҕомтотун ылбыт буруйу оҥорууга...
Ардыгар дьон долгуйар кэмигэр дьокутааттар сүтэн хаалаллар, ол иһин дьон-сэргэ, общественность мунаахсыйар.
Биэнсийэ сааһын үрдэтиигэ, нолуок-тарыып үрдүүрүгэр, бүддьүөт сыыһа ылыныытыгар дьокутааккыт эһигини кытта кэлэн сүбэлэстэ дуо? Тоҕо дьонун санаатын истибэккэ норуот интэриэһин утары куоластыыр? Итини куоластааччы бэйэтэ сэмэлиэн наада. Биһиги дьокутааты талабыт уонна босхо ыытан кэбиһэбит.
Билигин талыллар дьокутааттар норуот накааһын толорон, отчуотун уонна сырдатар үлэтин элбэтиэхтээх. Быыбардааччы эмиэ хонтуруолга ылыан наада, астыммат буоллаҕына, ону биллэриэхтээх.
Ил Түмэн Дуумаҕа да ылынар сокуоннарга бэйэтин санаатын чаҕыйбакка биллэриэхтээх — биэнсийэҕэ тахсар саас үрдээһинэ, оҕону төрүт тылынан үөрэтии, нолуоктар-тарыыптар үрдээһиннэрэ.
Ил Түмэҥҥэ КПРФ сүрүн баайбыт АЛРОСА акциялара хаһан да атыыга барбаттарын уонна атын баайы хостооччулар өрөспүүбүлүкэҕэ хайыһалларын туруорсуоҕа, сүрүн боппуруоспут буолар.
Саха сирэ космос сыбаалката, химия содула, буортулаах оҥорон таһаарыы буортулуур сирэ буолбатын туруорсуохпут.
Тыа сирэ кииннэммит ититиигэ холбунуутун түргэтитэн, суол-сибээс, ыччат үлэлээх буоларын ситиһихпит. Бааһынайдар, оҥорон таһарааччылар үбү быһаччы ылалларын туруорсабыт, ситиһиэхпит. Онно сөптөөх былааннар бааллар, бырагырааммабытыгар барыта учуоттанна.
Быыбар ыраастык, кирэ-хаҕа суох барыахтаах. Быйылгы быыбардар үҥсүһүүтэ-хасыһыыта элбээтэ, сууттаһар муода кэлбит. «Сууттаһан кыайбыт» диэн истэргэ да сүөргү. Сэбиэскэй кэмҥэ быыбар бырааһынньык курдук ааһара, тоҕо билигин этиһиигэ-үөхсүүгэ кубулуйда.
Манна даҕатан эттэххэ КПРФ хандьыдааттара, хомуньуустар кими да кытта сууттаспатыбыт. Кими да уһултарбатыбыт. Барыта ыраастык ааһыахтаах диэн үлэлиибит.
КПРФ испиэһэгэр уонна биир мандааттаах уокуруктарга күүстээх эдэр, орто саастаах хамаанда туруордубут. Бары бэйэ дьоно. Тойон-хотун суох, үксэ тыа сириттэн төрүттээх общественниктар, санааларын аһаҕастык этинэр дьон. Куоластыахпыт-туруорсуохпут иннинэ ким эрэ айаҕын манаабакка бары бэйэбит санаабытынан куоластыыр дьону мустубут.
Хомуньуустар уонна биһиги өйөөччүлэрбит эппиэтинэһи ыларга бэлэммит. Дьокутаат аатын өрө көтөҕүөхпүт, Ил Түмэн статуһун чөлүгэр түһэриэхпит. Норуот Өрөспүүбүлүкэ парламеныгар итэҕэйэрин ситиһиэхпит!
Сахабыт сирин дьоно, КПРФ тула түмсүөххэ!
Ил Түмэҥҥэ уонна оройуон сэбиэттэригэр Коммунистическай баартыйа хамаандатын өйөөҥ, сыыһыаххыт суоҕа!
Ил Түмэҥҥэ
хомуньуустартан хандьыдааттар.