Эдэр сааһыттан талбыт баартыйатыттан киэр хайыспатаҕа. Киниэхэ бартыыйа эбээһинэһин толорорго үөрэммит эппиэтинэстээх буолуу үрдүк хаачыстыбата, ону таһынан төһө даҕаны саас ыраатан истэр, аармыйа саҕанааҕы байыаннай выправка күннээҕи олоххо эрчими, үлэҕэ хамнаска дьулууру, тулуурдаах буолууну биэрэн эрдэҕэ. Онон бүгүн биһиги эрэдээксийэбитигэр Семен Никитин ыалдьыттыыр.

• Семен Иванович, үтүө күнүнэн! Чурапчы уонна Таатта улуустарыттан Ил Түмэн Мунньаҕар туох үлэни ыыта сылдьаргын билиһиннэр эрэ.
• Үтүө күнүнэн, күндүтүк саныыр улууһум олохтоохторо. Куоракка ыытыллыбыт 8 сессияҕа барытыгар сырыттым. Маҥнай, Ил Дархан Айсен Николаевка партийнай фракциялар мунньахтара тэриллибитэ. Быһаччы эттэххэ, дьокутааттар туруорсууларын, бастаан, күүскэ ырытыһан, илдьиритэн баран киллэрэллэр эбит. Ону кэмитиэт мунньаҕар көрөллөр. Бэйэм тыа хаһаайыстыбатын, социальнай уонна доруобуйа харыстабылын, дьиэ кэргэн кэмитиэттэригэр баарбын. Бастакы сессияҕа сэрии сылларын оҕолоругар сокуон ылыныллыбыта, ону хомуньуустар партийнай фракциябытынан киллэрбиппит. Урукку өттүгэр, хас да сылы мэлдьи ылыныллыбакка сылдьыбыта, олохтоох дьон биэс чэпчэтии көрүҥүттэн биирин да талларбакка эрэ харчы бэриллиитин туруорсаллар, онуоха “Ситим” медиа бөлөх генеральнай дириэктэрэ Мария Христофорова ити боппуруоһу үөрэтэр сыалтан биһиги баартыйабытыгар сыстан күүскэ үлэлэһэр. Улуу Кыайыы 75 сылыгар дьон туруорсуута олоххо киириитин ситиһиэхтээхпит. Иккиһинэн, дьиэ кэргэн боппуруостарыгар кэккэ сокуоннары ылыныыга үлэлэстим. Дьиэ кэргэн кэмитиэтигэр Алена Николаевна Атласова диэн күүстээх салайааччылаахпыт.

Тыа хаһаайыстыбатын боппуруостарыгар туһунан бырагыраама ылыныллыахтаах. Итиниэхэ СӨ Бырабыыталыстыбатын бэрэссэдээтэлэ Владимир Солодов ыам ыйын 31 күнүгэр диэри түмүктүүллэригэр сорудахтаабыта. Ону билсэр сыаллаах улуус дьаһалтатын тыа хаһаайыстыбатын салаатыгар сылдьыахтаахпын.

Ааспыт сырыыга Доруобуйа харыстабылыгар Ил Түмэн дьокутаата Михаил Гуляев салайааччылаах, доруобуйа харыстабылын миниистирэ кыттыылаах мунньах ыытыллыбыта. Онно үлэ штатын сарбыйыы уонна уларытыы боппуруостара сытыытык турбуттара, итиннэ Дириҥ, Хатылы нэһилиэктэрин балыыһаларын таарыйбыттара. Ол гынан баран, ити боппуруостар эмиэ үөрэтиигэ сылдьаллар. Нэһилиэнньэ, биллэн турар, утарсар, онон кэлэр сессияҕа туспа боппуруос быһыытынан киирэрэ буолуо.

Ити ааттаталаабыт кэмитиэттэрим таһынан, үөрэх эйгэтигэр кыттыпсаппыт эрээри, бу кыһын бүддьүөтү түҥэтиигэ, Чурапчы колледжыгар 2021 сылга диэри 90 миэстэлээх уопсай дьиэни туруорсубутум, ол былааҥҥа киирбитэ, онно министиэристибэ үлэлиэһээхтээх.

Тыа хаһаайыстыбатын өттүгэр “Маарыкчаан” ПО Хоптоҕо нэһилиэгэр килиэп бэкээринэтин тутуутун туруорсар суругу киллэрбиттэрин, хамсааһыны таһаарар сыалтан, тыа хаһаайыстыбатын миниистиригэр Александр Атласовка киирэ сылдьыбытым. Кэпсэтии тахсыбыта, аны Хоптоҕоҕо гаас киирэринэн, “Маарыкчаан” ПО кэлин ити боппуруоһу күүскэ туруорсубаппар эттэ, ол эрээри Чурапчыга резервнэй бэкээринэ быһыытынан сырыттын дии саныыбын.

Бу саас Мындаҕаайыга Бырабыыталыстыба уонна баһылык отчуотугар сырыттахпына, “эбэни туоруур паром наада” диэн ис хоһоонноох миэхэ анаан сурук кэлбитэ. Бу суругу туппутунан, Тарасовка киирэ сылдьыбыппар, ЛОРП начаалыстыбатыгар быһа сорудах биэрбитэ, онон ити боппуруос тула үлэлэһэ сылдьаллар. Кэлэр да түгэнигэр, баржа быһыытынан аҕалыахпытын сөп диэн быһаарбыттара, ити кэпсэтиигэ уруккута тырааныспар миниистирэ Владимир Членов кыттыһан, көмөлөһөрүн биллэрбитэ. Аны туран, “Кырамах” бааһынай хаһаайыстыба баһылыга Николай Лыткин: “Сирим-уотум кыра, 80 төбө сүөһүлээхпин. Онон оттуур сирдэ булан кулу” диэн ис хоһоонноох суругу тиксэрбитэ. Бу боппуруоһу быһаараары, икки төгүл Дьокуускай Мэриятыгар киирэ сырыттым, онуоха дьонум: “Баһаалыста ол киһигин аҕал, биһиги сири аренда быһыытынан биэрэбит”, - дииллэр. Суругу тиксэриэххит иннинэ үчүгэйдик быһаарсыҥ, ырытыһыҥ диэн сүбэлиэм этэ, биир бэйэм киирбит суругунан тута боппуруоһу быһаара сатыыбын, онон болҕомтолоох буоларгытыгар ыҥырабын.

Үлэм таһынан улуустааҕы бойобуой дьайыылар бэтэрээннэрин түмсүүтүн кытары ыкса үлэлиибин, ыытар тэрээһиннэригэр, төһө кыалларынан, кытта сатыыбын. “Юнармия” чэрчитинэн оскуола оҕолоругар байыаннай-патриотическай хамсааһыны тэҥҥэ ыытыһабын уонна толору өйүүбүн. Үүнэр көлүөнэ ыччат бары өттүнэн толору сайдыылаах буолуохтаах.

Елена Софронова диэн Таатта олохтооҕо 90 сааһын туолла. Уруккута партийнай үлэһит, хаһыаччыт. Онно тиийэн кыттыыны ылан кэллим. Онно бара таарыйа, Игидэй уонна Туора Күөл нэһилиэктэригэр сылдьан, биирдиилээн кыһалҕалаах дьону кытары көрүстүм, отчуттарга, балыыһаҕа сырыттыбыт.

Бэйэбит баартыйабыт чэрчитинэн бүтүн дойду үрдүнэн миитиннэр тэрилиннилэр, онуоха Чурапчы нэһилиэгин дьаһалтата көҥүллээбэтэ. Дьиҥэр, от ыйын 14 күнүгэр буолуохтаах миитиҥҥэ, көҥүл ылар инниттэн, нэһилиэк баһылыга Владимир Сивцев аатыгар от ыйын 1 күнүгэр сурук киирбитэ. Ол да үрдүнэн дьиэ иһигэр мунньах тэрийэн ыыппыппыт. Үлэ сүнньүнэн кэпсээтэххэ итинник.

• Семен Иванович быыс булан кэлэн кэпсээбиккэр улаханнык махтанабыт. Таһаарыылаах үлэни, кытаанах доруобуйаны, дьиэ кэргэҥҥэр нус-хас олоҕу баҕарабын.

Кэпсэттэ Семен Жендринскэй. Ааптар бэйэтэ хаартыскаҕа түһэриитэ.