Василий Иннокентьевич, Эн олоҕун дьолуҥ, олох олорор аналгын Нуораҕанаттан булуоххуттан Мэҥэ-Хаҥалас оройуонун кытта быстыспат сибээстээххин. Ол курдук, Ленин аатынан совхоз комсомолун секретарынан, Төҥүлү уонна Нуораҕана оскуоларын историяҕа учууталынан, Төҥүлү нэһилиэгин Сэбиэтин исполкомун бэрэссэдэтэлинэн, Төҥүлүтээҕи профтехучилище преподователинэн үлэлээбитиҥ.
Эн үтүө суобастаахтык, айымньылаахтык, таһаарыылаахтык, бары билиигин, дьоҕургун биэрэн үлэлээбитин туһунан күн бүгүн саастаах дьон, оҕо, эдэр эрдэхтэринэ эйиэхэ үөрэммит, бииргэ үлэлээбит коллегаларыҥ үгүстүк ахтан-санаан ааһаллар. Кинилэр олохторун суолун булалларыгар, идэлэрин талалларыгар сүбэ-ама биэрбитиц туһунан истиҥник-иһирэхтик санаан кэпсииллэр.
Сэбиэскэй былаас суох буолбут, Ленин олохтообут Коммунистическай партия баһылыыр оруола тохтотуллубут ыарахан кэмигэр Эн, Василий Иннокентьевич, Коммунистическай партияҕа бэриниилээххин, халбаҥнаабат, тулхадыйбат санаалааххын, позициялааххын көрдөрбүтүҥ. Партияҕын таҥнарбатаҕыҥ. Төттөрүтүн, биир санаалаахтаргын, Төҥүлүтээҕи маҥнайгы сүһүөх партийнай тэрилтэ коммунистарын түмэн, партийнай тэрилтэни чөл хаалларбытыҥ. Ол түмүгэр күн бүгүн Төҥүлү партийнай тэрилтэтэ 30 коммунистаах улууска уонна республикаҕа биир улахан маҥнайгы сүһүөх партийнай тэрилтэнэн буолар. Партийнай тэрилтэ коммунистара улуус уонна нэһилиэк күннээҕи олоҕор, общественнай политическай, культурнай, спортивнай тэрээһиннэргэ актыыбынайдык кытталлар.
Партийнай тэрилтэ алта коммуниһа быһаччы тыа хаьаайыстыбатын салаатыгар үлэлии сылдьаллар. Ол курдук, “Тумул” тыа хаһаайыстыбатын производственнай кооперативыгар коммунистар үрдүк таһаарыылаахтык үлэлииллэр. 60-тан тахса үлэһиттээх үлэ коллективын коммунист Таисия Васильевна Десяткина салайар. Солбуйааччытынан коммунист Альберт Сергеевич Громов үлэлиир. Түөрт коммунист ыанньыксыттаан, үрүҥ илгэни — үүтү дэлэтиигэ таһаарыылаахтык үлэлии-хамсыы сылдьаллар.
«Тумул» тыа хаһаайыстыбатын производственнай кооперативын чилиэннэрэ ылыммыт соруктарын, былааннарын сыллата чиэстээхтик толороллор. Хаһаайыстыба салалтата үлэһиттэригэр сокуоннарынан көрүүлүбүт бары бырааптарын толору туһанналларыгар, үбүн-харчытын суотугар чэпчэтиилээх өҥөлөрү, көмөнү көрөр. Ол иһин үлэһиттэр хаһаайыстыбаҕа бигэ туруктаах, сайдар кэскиллээх буоларын туһугар ис сүрэхтэриттэн ылсан,кыһамньылаахтык, таһаарыылаахтык күүстэрин түмэн үлэлииллэр.
Василий Иннокентьевич, Эн Улуу Кыайыы 75 сылыгар Төҥүлү нэһилиэгин Сэрии бэтэрээннэрин болуоссатыгар коммунистар көмөлөрүнэн И.В. Сталин пааматынньыгын туруортарбытыҥ.
Эн киһи быһыытынан көнө, судургу, сымнаҕас үтүө майгылааххын. Ылыммыт дыалаҕын хайаан да тиһэҕэр тиэрдэҕин. Нэһилиэнньэ олохтоохторо Эйигин ирдэбиллээх, чиэһинэй, толоругас, партийнай эппиэтинэстээх, олоххо актыыбынайэ позициялаах коммунист быһыытынан билинэллэр. Эн үлэлээн кэлбит олоххун үрдүктүк сыаналаан, эйиэхэ истиҥник сыһыаннаһаллар, дириҥник ытыктыыллар.
Ытыктабыллаах Василий Иннокентьевич, үбүлүөйдээх 85 сааскын томточчу туолбуккунан өссө төгүл итиитик-истиҥник эҕэрдэлиибит! Уһун үйэлэнэн, дьоллоох доруобай буол диэн алҕыыбыт!
Вячеслав КУЛИЧКИН,
РФКП Саха сиринээҕи комитетын бастакы секретара.
Валерий ФИЛИППОВ,
РФКП Мэҥэ-Хаҥалас оройуонунааҕы комитетын
бастакы секретара.