Эрдэ иһитиннэрбиппит курдук, бу дьыл сэтинньи 24 күнүттэн Дьокуускай куорат федеральнай суутугар саха эстрадатын артыыһа Виктор Иванов – Сиэйэ Уолун дьыалатын көрүү саҕаламмыта.

Суут мунньаҕын бастакы күнүгэр сууттанааччы Иванов уонна эмсэҕэлээччи Сергей Мекюрдянов итиэннэ кини балта туоһу быһыытынан көрдөрүү биэрбиттэрэ. Онтон ахсынньы 3 күнүгэр суут эмсэҕэлээччи уонна судаарыстыбаннай буруйдааччы хадатаайыстыбаларын өйөөн, суруналыыстары саалаттан тахсарбытыгар модьуйбута. Ахсынньы 9 күнүгэр судьуйа Лена Говорова  таһаарбыт уурааҕынан, эмсэҕэлээччи уонна сууттанааччы ойохторо көрдөрүү биэрэр күннэригэр атын истээччилэр сылдьаллара эмиэ бобуллубута. Суут силиэстийэтэ салҕанан, өрүттэр мөккүөрдэрин (прения) кэнниттэн, судаарыстыбаннай буруйдааччы Эльвира Минеева сууттанааччы Виктор Ивановы 11 сылга көҥүлүн быһары туруорсубута. Онтон бүгүн, ахсынньы 25 күнүгэр, киэһэ 16.30 мүн., сууттанааччыга тиһэх тыл бэрилиннэ. Сууттанааччы Иванов тиһэх тылыгар: “Убаастабыллаах суут! Бу дьыалаттан сылтаан, икки ыал улахан охсууну ыллыбыт. Мин санаабар, суут мунньаҕар дьыала ис дьиҥэ үчүгэйдик көрүллүбэтэ, Сергей биһиги ыал олоҕор орооспотоҕо буоллар, бу дьыала буолуо суоҕа этэ. Бэйэм улаханнык хоргутабын, маннык буолбутуттан. Сууттан дьыалабын ис иһиттэн сирийэн көрөргүтүгэр, көҥүлбүн хаарчахтаабаккытыгар көрдөһөбүн. Кыаҕым баарынан эмсэҕэлээччигэ моральнай уонна материальнай хоромньуну төлүүргэ кыһыллыам“, -- диэтэ. Судьуйа бириигэбэри ааҕыы оптуорунньукка, ахсынньы 30 күнүгэр, буолуоҕун иһитиннэрдэ. Бүгүн суут мунньаҕа бүтэн, тарҕаһыы саҕана күүтүллүбэтэх түгэн буолла. Суут дьиэтиттэн тахсар ааҥҥа элбэх туоһу көрөн турдаҕына, эмсэҕэлээччи Сергей Мекюрдянов сууттанааччы Виктор Иванову тэмтэрийиэр диэри кулгаах тааска охсон баран, “кулгааҕыҥ быстыа суоҕа” диэн көбдьүөрбүт. Оттон Мекюрдянов ойоҕо биир кыыһы быдьар тылынан үөхсүбүт. Иванов уонна эдэр кыыс полицияны ыҥыран, сайабылыанньа суруйдулар. Участковай боломуочунай ити түгэни көрбүт туоһулартан быһаарыы сурук ылаттаата. *** Вера МАКАРОВА.