Түөрт ыйдаах үлэ түмүгүнэн маҥнайгы сүһүөх партийнай тэрилтэлэр бука бары отчуоттаан бүттүлэр. Түмүгэр РФКП Бүлүү оройуонунааҕы партийнай тэрилтэтин отчуоттуур-быыбардыыр конференциятын тэрийдилэр. Конференция үлэтигэр реском аатыттан мин кыттыыны ыллым.
Мунньах саҕаланыытыгар партия бэтэрээнигэр Алексей Яковлев 75 сааһынан туолбутунан “ССРС тэриллибитэ 100 сыла” РФКП Киин Комитетын юбилейнай мэтээлин, “Партия бэтэрээнэ” анал бэлиэни уонна “Саха сирин чулуу коммунистара” серияҕа тахсыбыт “Артур Николаевич Алексеев” диэн кинигэни туттардым. Маны таһынан РФКП Киин Комитетын аатыттан кэккэ коммунистары юбилейнай мэтээллэринэн наҕараадалаатым.
Конференцияҕа тоҕус делегат талыллыбыттыттан бары кэлбиттэр. Партийнай тэрилтэ үлэтин туһунан РФКП Бүлүүтээҕи райкомун бастакы секретара Василий Филиппов отчуоттуохтаах этэ да, кэлбэтэ. Онон туох үлэ барбытын-барбатаҕын туһунан отчуоттуур дакылааты комиссия салайааччыта Мааны Нуоралдьыма Толбон кыыһа оҥордо.
Дакылаатчыт оройуоннааҕы партийнай тэрилтэ үлэтэ мөлтөөбүтүн сүрүн биричиинэтин сөпкө ырытта. Ол курдук, нэһилиэнньэни кытта үлэ кыччаабытын, пропаганда күүһэ суох буолбутун, ыалларга көмө уонна өйөбүл суоҕун тоһоҕолоон бэлиэтээтэ.
Делегаттар кыһалҕалаах боппуруостары чопчулаан быһаарыстылар. Кэккэ коммунистар эмиэ этиннилэр. Кинилэр: “Райком бастакы секретарынан Алексей Яковлев үлэлии сырыттаҕына, үлэ син барар этэ. Кэнники сылларга үлэ тохтоон, туох да тэрээһин барбат буолла”, — диэн түмүктээтилэр.
Райком иккис секретара Олег Попов син үлэлии сатаабыттарын туһунан этиннэ. Ол гынан баран 10 депутаттаах сылдьан, онтон туох да туһалааҕы ылбатахтарын бэлиэтээтэ. Василий Юрьевич кэнники чахчы үлэни тохтотон кэбиспитин туһунан этиини кытта сөбүлэстэ.
Араас этиилэр, боппуруостар кэннилэриттэн райком саҥа састаабын талыы буолла. Райкому 12 киһиттэн талыахха диэн тыл киллэрдилэр. Кистэлэҥ куоластааһын түмүгүнэн испииһэккэ киирбит дьон 100 % талылыннылар. Онтон хонтуруоллуур-ревизионнай комиссия чилиэннэрин эмиэ кистэлэҥ куоластааһынынан таллылар. Петр Новгородов уонна Мария Миронова эмиэ 100% куолас ылан, комиссия чилиэннэринэн быыбарданнылар. Манан конференция үлэтэ түмүктэннэ.
Райком тэрээһин пленумугар 12 чилиэниттэн сэттэ киґи кытынна. РФКП Бүлүүтээҕи райкомун бастакы секретарын талыыга мин реском бюротун быһаарыытынан Мааны Нуорулдьума Толбон кыыһын кандидатуратын пленум көрүүтүгэр киллэрдим. Ону бары киниэхэ 100 % куоластаатылар. Онтон Мааны Нуоралдьыма Толбон кыыһын этиитинэн райком иккис секретарынан Марк Харлампьев быыбарданна. Кини билигин Дьокуускайга олорор буолан, өссө биир райком секретарын таларгэ этии киирдэ. Эмиэ райком бастакы секретарын этиитинэн. Мария Оконешникова 100% талылынна.
Райком бюротун чилиэннэринэн кистэлэҥ куоластааһынынан биэс киһи талылынна:
— Мааны Нуоралдьыма Толбон кыыһа;
— Марк Харлапьев;
— Мария Оконешникова;
— Егор Рожин;
— Ульяна Павлова.
Бары талыллыбыт райком секретардарыгар, бюро уонна хонтуруоллуур-ревизионнай комиссия чилиэннэригэр эҕэрдэ тыл эттилэр. Бүлүү райкомуттан киэҥ далааһыннаах үлэни ирдээтилэр.
Пленум быһаарыытынан, саҥа райком иннигэр маннык соруктар туруорулуннулар: бары нэһилиэктэргэ партийнай тэрилтэлэри чөлүгэр түһэрии, ыалларга, эдэр ыччат коллективтарыгар элбэхтик сылдьыы, депутаттары кытта сибээһи бөҕөргөтүү. Ону таґынан, балаҕан ыйын 20 күнүгэр буолар Госдума быыбарыгар бары актыыбы мунньан, дьону бэйэ диэки тардан күүстээх хампанньаны тэрийэргэ уураахтаатылар. Манан пленум үлэтин түмүктээтэ.
Иннокентий ВАСИЛЬЕВ,
РФКП Саха сиринээҕи комитетын
иккис секретара.
SakhaKPRF.ru