Оттон Ил Түмэҥҥэ быыбардыырга кыах хаһан баҕарар баар, биир мандааттаах быыбардыыр уокуруктар бюллетеннэрин кытары иккис бюллетеҥҥэ партиялары талыы бэрээдэгэ уруккаттан баар . Бу быыбарга мин Дьокуускай куорат Поярковскай уокурукка РФКП партия испиэһэгинэн уонна эмиэ РФКП-тан биир мандааттаах уокуругар бэйэм кандидатурабын туруоруннум. “Тоҕо туруоруннум..? Мин кимминий..?” – диэҥҥэ быыбардааччыга хоруйдаары суруйарга сананным.
Ил Түмэн диэн Саха сиригэр сокуону айар үрдүкү уорган буолар, бүгүн бүттүүн Сахабыт сирин бюджетын барытын ылынар уонна тыырар былаас биир таһыма буолар. Биһиги олохпут-дьаһахпыт, үлэбит-хамнаспыт, биэнсийэбит, үлэбит миэстэтэ, оҕолорбут инникилэрэ барыта манна быһаарыллар.
Ааспыт ыҥырыылаах састааптар үлэлэрин үгүс өттүгэр сөпсөспөт буоларбыттан, атын суолларынан бэйэбит боростуой норуоппут туһатыгар үчүгэй, туһалаах сокуоннары оҥорсуом, ол нөҥүө олохпутун үтүө өттүгэр көннөрсүөм диэн санааттан Ил Түмэҥҥэ быыбарга киирсэргэ сананным.
Бүгүн тыа сиригэр үлэлии-хамсыы сылдьар киһи буоларым быһыытынан, сыана ыарыы турарыттан саҕалаан бюджет ситэтэ суохтук тыырыллыытыгар, республикабытыгар сир баайыттан нолуок быһыытынан эбии дохуот ситэри киирбэтигэр, уһук хоту сытар улуустары ас-үөл өттүнэн хааччыйыы быстар мөлтөҕөр, уматык сыаната күн-түүн үрдүүрүгэр дууһам уонна санаам сөбүлэспэт. Туораттан көрөн олордохпутуна туох да уларыйыа суоҕа, ол иһин тус бэйэбитинэн ороостохпутуна эрэ сатаныыһы диэн санааттан быыбарга кыттарга сананным. Бэйэбит ылсан уларыта сатаабатахпытына ким ылсыаҕай, балаһыанньаны тупсарыаҕай?
Аны тоҕо чопчу РФКП-тан туруннуҥ диэн ыйытыкка хоруйдуур буоллахпына маннык. Билигин аҥардас кыһыл тылынан эрэннэриилэртэн туттунар, Ил Түмэн мунньахтарыгар былаас партията киллэрэр норуоту баттыыр сокуоннарын утары куоластаан, норуот туһугар үлэтин дьыаланан дакаастаабыт соҕотох партия буолар. Атын партияларбыт диэн ааттанар “хармааҥҥа баар” партиялар Ил Дархан быыбарыгар бэйэлэрин кандидаттарын туруорбатылар, манан былаас партиятын кытта биир куомуннаах буолалларын көрдөрдүлэр. Онон бүгүн норуот туһугар үлэлиир, кини интэриэһин туруулаһар соҕотох биир РФКП хаалан турар.
“Эн кимҥиний?” диэн ыйытыкка хоруйдуур буоллахха, мин Нам улууһугар 1989 сыллаахха боростуой үлэһит дьон, кочегар уонна учуутал, дьиэ кэргэнигэр маҥнайгы оҕонон төрөөбүтүм. 2006 сыллаахха оскуоланы бүтэрэн тыа хаһаайыстыбатын техникумугар «сир-баай сыһыаннара» диэн үөрэххэ киирэн 2008 сыллаахха бүтэрбитим. Кэргэннээхпин, 3 оҕолоохпун. Үөрэхпин бүтэрэн кэлээт 2009 сылтан бааһынай хаһаайыстыба тэринэн 5 гектартан саҕалаан 23 гектарга тиийэ хортуоппуй үүннэриитинэн уонна атыытынан дьарыктаммытым 14 сылыгар барда. Үлэм көрдөрүүтүнэн 2014 сыллаахха «Лучший молодой фермер Якутии» анал ааты ситиспитим, 2015 сыллаахха Москваҕа ВДНХ боруонса мэтээлин хаһаайына буолбутум. Бүгүн Ил Түмэн депутатын көмөлөһөөччүтүнэн үлэлиибин.
Норуот депутата диэн кимий, хайдах киһини биһиги норуот депутатынан талыахтаахпытый? Кини аҥардас былаас партията ыйыытынан кнопканы эрэ баттыы олорбокко Саха сирин, норуотун туһатыгар, олохпут экономическай өрүттэрэ тупсарын туһугар сокуону оҥоруунан уонна уларытыынан дьарыгырыахтаах. Бүгүн көрдөхпүтүнэ былаас партиятыттан туруммут депутаттар улахан аҥардара үөһэттэн кэлэр ыйыынан сокуоннары ылына олороллор. Ардыгар норуоту баттыыр сокуоннары бигэргэтэллэр. Ол курдук биэнсийэ реформатын ылыныылара, сир баайын хостооһунуттан нолуок быһыытынан киириэхтээх дохуоту сир баайын хостуур улахан хампаанньаларга нолуокка чэпчэтиилэри биэрэ олороллор. Ол содулугар республикабытыгар сыллата хас эмэ уонунан миллиард үп ситэ киирбэккэ турар. Итинтэн сиэттэрэн республикабыт бюджетыгар үп тиийбэккэ ситэриилээх былаас кэмчилээһининэн сирэйдэнэн дьону үлэтэ суох хаалларан, хамнаһы сарбыйар чэпчэки суолу ордорор. Кэлин биэс сылга Дьокуускайга арыгы уонна пиибэ атыылыыр туочукалар биллэрдик элбээтилэр, биир өттүнэн дохуот киллэрэр аатыраллар, иккис өттүнэн дьону арыгынан хатаҕалыыллар. Ону таһынан дьэллик ыттартан дьону харыстыырга Ил Түмэн биир да сокуону ылыммата. Боростуой дьоҥҥо ыстарааптар уонунан мөлүйүөҥҥэ тиийэ суруллаллар, оттон сир баайын хостуур улахан хампаанньа Бүлүү өрүһү киртитиитигэр дуона суох аҕыйах тыһыынчаҕа ыстарааптаммыта.
Бу барыта бүгүн сокуон оҥорор уоргаммыт ситэ үлэлээбэтин дуу.., туохтан эрэ сэрэнэ-сэрбэнэ, дьиксинэ олоророрун дуу.., эбэтэр былаас сабыдыала сүрдээх күүстээҕиттэн куттанарын дуу.., быһатын эттэххэ дьонтон, норуоттан олус тэйбитин аһаҕастык көрдөрөр.
Киһи сонньуйуох сорох депутаттарбыт коррупционнай дьыалаларга эриллэн сууттаналлара улугуруу биир көрүҥэ буоларын көрдөрөр. Ону таһынан былаас партиятын испииһэгинэн промышленность генераллара, бюджет эйгэтиттэн былааска бэриниилээх салайааччылар хастыы эмэ болдьоххо кур бэйэлэрэ кубулуйбакка талыллаллар. Маннык балаһыанньа хатыламматын туһугар биир мандааттаах уокуруктартан сибиэһэй уонна норуокка чугас уонна норуот ортотуттан депутаттар талыллыахтаахтар. Оттон партиялартан бэйэтин үлэтинэн норуот интэриэһин дьиҥ чахчы өрө туппут РФКП-тан кандидаттарга баһыйар үгүс куолас бэрилиннэҕинэ эрэ Ил Түмэммит чахчы норуот парламенын үрдүк аатын ситиһиэҕэ. Атын суолбут суох!
Сорох быыбардыыр бырааптаах дьон билиҥҥи быһыыны-майгыны утарар санааттан “атахтарынан куоластыыллар”, ол эбэтэр быыбардыы кэлбэттэр. Биири өйдүөххэ наада – билигин былаас куоластааһыҥҥа кыттыы алын боруогун суох оҥорон турар, биллэн турар бэйэтин туһатыгар. Онон быыбарга кыттыбатаххына ити утарар былааһыҥ миэлиҥсэтигэр уу кутаҕын, ону өйдүөххүн наада.
Итинтэн сиэттэрэн конституционнай бырааппытын, биэс сылга биирдэ туһанар БЫЫБАРДЫЫР БЫРААППЫТЫН бука бары дьиҥнээхтик, тус бэйэбит туһугар туһаныаҕыҥ диэн бар дьоммун ыҥырыахпын баҕарабын. Мантан атын бэйэбит санаабытын, куоласпытын аһаҕастык этинэр кыахпыт суох. Мин кими даҕаны миитиҥҥэ ыҥырбаппын, былааска аһаҕастык утары туруорбаппын, биир көрдөһүүбүн эрэ тиэрдиэхпин баҕарабын- БУКА БАРЫ БЫЫБАРГА! Бэйэбит олохпутун түстүөҕүҥ, оҕолорбут инникилэрин туруулаһыаҕыҥ..!!!
Убаастабылы кытта эһиги уолгут Эдгар КОНСТАНТИНОВ ,
Дьокуускай куорат Поярковскай уокурукка
РФКП-тан депутакка кандидат