Ити кэнниттэн «Таатта» совхоз урукку парткомун секретара Роман БОГАТЫРЕВ киэҥ ис хоһоонноох дакылаат оҥордо. Уруккулуу үрдүк патриотическай тыыннаах концерт буолла. Манна Чурапчыттан эдэр коммунистар уонна «Арчы» иһинэн үлэлиир «Алгыс» ветераннар хордара, барыта 47 киһи, кыттыыны ылан кэллилэр. Концерга хору таһаарааччы Гавриил МАКАРОВ, биирдиилээн ырыаһыттар Гавриил МАКАРОВ, Борис ВАСИЛЬЕВ, Василий КУЗЬМИН уонна Зоя МАКАРОВА ырыалара ытыс тыаһынан ньиргийэн, биһирэбили ыллылар. Тааттаттан урукку нэһилиэк баһылыга коммунист Николай ТУЛААһЫНАП бииргэ төрөөбүт балтын уонна быраатын ырыалара ордук биһирэннилэр. Ол кэнниттэн тыастаах-уустаах 60 — 80-с сыллары санатар дискотека, мустубут дьон үөрэн-көтөн, сүргэбит көтөҕуллэн ылаан-туойан, үҥкүүлээн эдэр сааспытын санаһан, дуоһуйа сынньанан тарҕастыбыт.

Кэлэр сылга Улуу Октябрьскай социалистическай революция 100 сыла туоларынан сибээстээн, анал хамыыһыйаҕа боппуруос көрүллэн, Чурапчы улууһугар тустаах үлэ ыытылларыгар сиэрдээх кэпсэтии буолан ааста.