Соторутааҕыта Сунтаар улууһун Кутанатыгар олохтоох коммунистар тыыл бэтэрээннэрин уонна сэрии оҕолорун ыҥыртаан, Кыайыы күнүгэр аналлаах үөрүүлээх бырааһынньык тэрийдибит. Сорох кырдьаҕастары массыынанан аҕалбыппыт.
Бастаан «Бригантина» диэн оскуола оҕолорун этэрээттэрэ байыаннай хаамыыны көрдөрдүлэр. Ленин пааматынньыгар гирлянда уурдулар. Быйыл оскуола оҕолоро Сунтаартан сэриигэ барбыт 70 киһи хаартыскатын оҥорторон, «Бессмертный полк» акцияҕа кытыннылар.
Мустубут дьону баһылык Николай Давыдов эҕэрдэлээтэ. Онтон мин, бэтэрээннэр сэбиэттэрин бэрэссэдээтэлэ, тыл этим. Салгыы оскуола директора Капитон Никифоров уоттаах-төлөннөөх эҕэрдэтин эмиэ бэтэрээннэргэ аадырыстаата. Кыайыы оһуохайын республикаҕа киэҥник биллэр этээччи Мария Афанасьева саҕалаабытын атыттар иилэ хабан ыллылар.
Салгыы бэтэрээннэрбитин кулуупка киллэртээн, бастаан хаартыскаҕа түһэрдибит. Биирдии коллективнай хаартысканы босхо биэртэлээтибит. Барыта тэрээһиҥҥэ 27 тыыл ветераннара уонна сэрии оҕолоро сырыттылар.
Кинилэргэ барыларыгар сыл аайы бэлэх оҥорооччубут. Быйыл эмиэ аһылык наборун туттардыбыт. Коммунистартан тыыл ветерана Вера Акимова уонна бэтэрээннэр сэбиэттэрин бэрэссэдээтэлин солбуйааччы Роза Николаева тэрээһин үлэҕэ актыыбынайдык кытыннылар. Эҕэрдэ нүөмэрдэри кулууп үлэһиттэрэ үрдүк таһымнаахтык бэлэмнээн, бэтэрээннэри сүрдээҕин үөртүлэр.
Парадка айан-суол тэрилтэтэ элбэх техникатын таһаарбыта, бырааһынньыгы олус киэргэттэ. Оҕо садын тэрилтэтэ сэбиэдиссэй Елена Трофимова салалтатынан сылын аайы «полевой кухня» үлэтин олус үчүгэйдик тэрийэр. Хааһы уонна фронтовой 100 граммы бэтэрээннэргэ түҥэттибит. Ити курдук, Кутана нэһилиэгин тэрилтэлэрэ бары түмсүүлээхтик бырааһынньыгы атаардыбыт.
Сэрии оҕолорун Саха сиринээҕи тэрилтэтин бырабылыанньатын бэрэссэдээтэлинэн элбэҕи эрэннэрэр уолбут, Ил Түмэн депутата, Коммунистическай партия Саха сиринээҕи комитетын бюротун чилиэнэ Иннокентий Васильев уонна кини солбуйааччытынан дьону-сэргэни кытта үлэҕэ улахан уоппутаах, «Госснаб» диэн улахан тэрилтэҕэ 49 сыл салайааччынан үлэлээбит Анна Кондратьева талыллыбыттарынан ис сүрэхпититтэн эҕэрдэлиибит уонна киэҥ далааһыннаах үлэни баҕарабыт.