Бөлөҕү КПРФ КК чилиэнигэр кандидат, КПРФ Саха сиринээҕи комитетын бастакы сэкиритээрэ, Госдумаҕа депутакка кандидат (партийнай испээһэккэ иккис нүөмэр), Ил Түмэн култуураҕа уонна СМИ-ри кытта сибээскэ сис кэмитиэтин бэрэссэдээтэлэ Вячеслав Куличкин салайан илдьэ сылдьар. Бөлөх састаабыгар КПРФ КК чилиэнигэр кандидат, КПРФ Саха сиринээҕи комитетын секретара, Дьокуускай куорат 26 №-дээх оскуолатын директора, КПРФ Дьокуускай куораттааҕы комитетын бастакы секретара, Дьокуускай куорат Думатын депутата, 29 №-дээх Саха сиринээҕи биир мандаттаах быыбардыыр уокурукка КПРФ-тан Госдума депутатыгар кандидат Айаан Васильев уонна Саха Өрөспүүбүлүкэтин Ил Түмэнигэр Үөһээ Бүлүү — Горнай 15-с №-дээх быыбардыыр уокуругар депутакка кандидат Дмитрий Петров бааллар.
Эрдэттэн былааннаммытын курдук, Үөһээ Бүлүүгэ көрсүһүүлэр Ороһу нэһилиэгиттэн саҕаланнылар. Ороһу кулуубугар бөлөҕү бастаан Ороһу нэһилиэгин баһылыгын солбуйааччы Анастасия Ильина уонна олохтоох партийнай тэрилтэ секретара Петр Кардашевкай көрүстүлэр. Көрсүһүүгэ кэлбит быыбардааччыларга КПРФ-тан депутакка кандидаттар тус бэйэлэрин уонна быыбар иннинээҕи бырагыраамаларын туһунан билиһиннэрдилэр.
Ол кэннэ педагогическай үлэ бэтэрээнэ, Ороһутааҕы норуот педагогикатын музейын өр сылларга салайан сылдьыбыт Федора Васильева республикаҕа капитальнай тутууну былааннааһын хайдах барарын туоһуласта. Федора Алексеевна Ороһу оскуолатын тутуута тохтоон турарын, онтон республикаҕа соҕотох норуот педагогикатын музейа олох эргэ дьиэҕэ үлэлии олорорун туһунан эттэ. Музейы тутууну өр сыллаах туруорсуу баччааҥҥа дылы болҕомтоҕо ылыллыбакка турарынан хомолтотун эттэ. Ону сэргэ музейы төрүттээбит кырдьаҕас коммунист Константин Чиряев эһиил 100 сааһын туоларынан сибээстээн бу боппуруоска туох эмит хамсааһын тахсарыгар баҕатын биллэрдэ.
Көрсүһүүгэ кэлбит Ороһу нэһилиэгин олохтоохторо көрсүһүүттэн астыммыттарын биллэрэн туран, КПРФ-тан турбут бары депутакка кандидаттарга ситиһиилэри баҕардылар.
Күнүс 14 чааска Үөһээ Бүлүү сэлиэнньэтин кытта алтыһа сытар Үөдүгэй нэһилиэгэр буолбут көрсүһүүгэ анааан-минээн ыаллыы Кэнтик нэһилиэгиттэн киирбит улуууспут биир ытык киһитэ, үлэ бэтэрээнэ Федор Николаев тыа сирин сайыннарыы норуот дьылҕатыгар оруолун туһунан дириҥ ырытыыны оҥордо. Филипп Лазаревич юрист үөрэхтээх киһи быһыытынан Саха сирин сиртэн хостонор барҕа баайын олохтоох омук кэскилигэр туһаныыга РФ Конституциятын туһааннаах ыстатыйаларыттан туорааһыннар баалларын ыйда. Буолаары турар быыбардарга хайаан да КПРФ-ка быыбардыыр наадатын итэҕэтиилээхтик дакаастаата.
Үөдүгэй нэһилиэгин олохтооҕо Валентина Егорова ийэ уонна эбээ буоларын быһыытынан аһылык хаачыстыбата мөлтөҕүн, ол үөһэ сыана үрдүү турарын ыйда. Төрүт аспытыттан тэйэн эрэрбит мөлтөх өрүттээх буолуон сөбүн эттэ. Украинаҕа бара турар анал байыаннай дьайыылар сотору кэминэн бүтэллэригэр баҕарда. Сэрииттэн кэлэр уолаттарбытыгар хайаан да психологическай көмө уонна ону сэргэ реаблитация наада буоларын ирдээтэ.
Улуус уонна Үөдүгэй нэһилиэгин ытык кырдьаҕастара, ветеринарнай сулууспа бэтэрээнэ, кырдьаҕас коммунист Сергей Федоров: “Бу биһиги партиябыттан турбут депутакка кандидаттары көрсөн, тылларын-өстөрүн истэн баран, саамай чулуу дьоммут турбуттар”, — диэн Сергей Иннокентьевич санаабытын, астыммытын биллэрдэ. — Бары да үлэлэрин-хамнастарын оройугар сылдьар уолаттар эбит. Талыллаллара буоллар, былаас ханнык да таһымыгар боппуруоһу, ис иһиттэн билэн туран, күүскэ туруорар кыахтаах депутаттар буолууһулар”.
Ытык кырдьаҕас КПРФ-тан Государственнай Думаҕа уонна СӨ Ил Түмэнигэр Үөһээ Бүлүү — Горнай 15-с №-дээх быыбардыыр уокуругар турбут депутакка кандидаттарга Вячеслав Куличкиҥҥа, Айаан Васильевка уонна Дмитрий Петровка алгыс курдук истиҥник-иһирэхтик ситиһиилэри баҕарбытын мустубут дьон дохсун ытыс тыаһынан доҕуһуоллаатылар.
Үөһээ-Бүлүүгэ үһүс көрсүһүү О.Д. Федорова аатынан улуустааҕы кииннэммит библиотекаҕа буолла. Көрсүһүүнү кылгас киирии тылынан КПРФ Үөһээ Бүлүүтээҕи райкомун бастакы секретара Георгий Степанов аста. Салгыы тылы улууска кэлэ сылдьар КПРФ XIX сьеһин уурааҕынан турбут депутакка кандидаттарга биэрдэ.
Олоҕун 60 сылын оҕону үөрэтиигэ уонна иитиигэ анаабыт педагогическай үлэ бэтэрээнэ, улуус ытык кырдьаҕаһа, 1964 сылтан партия чилиэнэ Ульяна Тимофеева көрсүһүүгэ бөлөх кыттыылаахтарыгар туһаайан тыл эттэ. “Айан ыраах суолун аахсыбакка, тустаах үлэҕититтэн быыс булан, бэйэҕитинэн кэлэн көрсүһэ сылдьаргытыттан мин, кырдьаҕас быыбардааччы, астынным”, — диэтэ Ульяна Терентьевна.
— Бары да олус улахан эппиэттээх үлэҕэ сылдьар уолаттар эбиккит. Тустаах үлэҕитигэр уопуттаах дьон буоларгыт тылгытыттан-өскүтүттэн да биллэ сылдьар. Сахабыт сирин инники сайдыытын торумнарын, кини салайар кадрдарын, олохтоох дьонун-сэргэтин кыһалҕаларын, үлэни хамнаһы да толору билэҕит. Онон депутат буоллаххытына, астык депутаттар буоларгытыгар бүк эрэнэбин — диэн кырдьаҕас учуутал санаатын кытта салгыы үллэһиннэ. — Кадр боппуруоһугар күүскэ үлэлэһиэххэ ннада. Хомойуох иһин, билиҥҥи ыччат ирдэбилэ улахан хамнас, толору хаччыллыылаах дьиэ-уот буолан хаалла .Ол иһин билигин тыа сиригэр учууталлар, быраастар курдук саамай наадалаах специалистар тиийбэттэр. Сэбиэскэй кэмҥэ партия кадр боппуоһунан күүскэ дьарыктанар этэ. Түмүгэр Ульяна Тимофеева бөлөх кыттыылаахтарыгар буолаары турар быыбардарга ситиһиилэри истиҥ-иһирэх тылларынан баҕарда.
— КПРФ билигин саамай эппиэттээх биэтэккэ кэллэ. Буолаары турар быыбардарга киниэхэ сүрүн күөн көрсүһээччинэн “Биир ньыгыл Россия” буолар чинчилээх, — диэтэ нэһилиэк мунньаҕын депутата Леонид Михайлов. — Сир баайын хостооһунтан киирэр үптэн олохтоох нэһилиэнньэ туһамматын кэриэтэ. Хата төттөрүтүн араас нолуоктарынан, ыстарааптарынан бэйэбититтэн харчы ылар курдуктар. Ол үрдүнэн сыана муҥутуурдук үрдүү турар.
Леонид Михайлов Үөһээ Бүлүү нэһилиэнньэтэ айылҕа эмсэҕэлээһиниттэн доруобуйата айгыраан олороро биллэр да, күттүөннээх дьаһаллар ылылла иликтэрин тоһоҕолоон бэлиэтээтэ. Ол курдук, онкология, хаан ыарыылаахтар элбэхтэр да, оннооҕор инбэлииккэ кыайан тахсыбат буоллулар. Эрэл билигин дьиҥнээх оппозиционнай паритяҕа — КПРФ-ка эрэ баар.
“Биир ньыгыл Россия” партияны кытта киэҥ өрүттээхтик киирсии наада. Инникитин коммунистар хас биирдии Сэбиэт састаабыгар хото баар буолуохтарын наада, оччоҕо эрэ туох эмит уларыйыы тахсыа этэ, — диэн туран, кини КПРФ кандидаттарыгар ситиһиилэри баҕарда.
Нэһилиэк биир актыыбынай олохтооҕо Игорь Шологонов: “Норуоппут инники дьылҕата тыа сирин сайыннарыыга сытар”, — диэн бэлиэтээтээтэ уонна улахан хаһаайыстыбалары чөлүгэр түһэрии наадатын ыйда. — Оччотугар үлэтэ суох кэлэ-бара сылдьааччы да аҕыйыа. Остуолбутугар бэйэ аһа-үөлэ элбиэ этэ. Итинник этэн туран инники эппиэттээх киирсиигэ, буолаары турар быыбардарга коммунистарга ситиһиилэри баҕарда. Түмүккэ, бөлөх салайааччыта Вячеслав Куличкин көрсүһүүттэн уонна санаа атастаһыытыттан астыммытын биллэрдэ.
Төрдүс түмүктүүр көрсүһүү РФКП Үөһээ Бүлүүтээҕи тэрилтэтин чилиэннэрин, улуус киинин коммунистарын кытта киэһэ 18 чаастан буолла. Бу көрсүһүүгэ бөлөх салайааччыта Вячеслав Куличкин Үөһээ Бүлүүгэ былааннаммыт көрсүһүүлэр бириэмэтигэр тэрээһиннээхтик барбыттарыттан уонна көрсүһүүлэргэ санаа атастаһыылартан астыммытын туһунан биллэрдэ уонна партийнай актыыпка махтанарын биллэрдэ. Буолаары турар улахан эппиэттээх быыбардарынан сибээстээн улуус партийнай актыыбын коммунистарын иннилэригэр сыал-сорук туруортаата.
Аһаҕас кэпсэтии, хардарыта санаа атастаһыытын усулуобуйатыгар истиҥ кэпсэтии быһыытынан барбыт көрсүһүүттэн бары да астынан тарҕастыбыт. Ол кэннэ кэлбит бөлөх чилиэннэрэ, улуууспут бу күннээҕи улахан ыалдьыттара чэй, кофе иһэ түһээт, Дьокуускай куорат диэки айанныы турдулар. Улууска куйаас күннэри баттаһа от үлэтэ күүрээннээхтик бара турар кэмэ уонна үгүстэр уоппускаҕа сырытталлар да, Үөһээ Бүлүүгэ көрсүһүүлэр дьыалабай төрүккэ ,истиҥник-иһирэхтик барбыттарын бэлиэтиир наада.
Георгий СТЕПАНОВ,
КПРФ Үөһээ Бүлүүтээҕи райкомун
бастакы сэкиритээрэ.
SakhaKPRF.ru