2016 сыл кулун тутар ый 12 күнүгэр «Ньурба» хаһыакка бэчээттэммит «Ньурба улууһун баһылыгар Б.Н. Поповка аһаҕас сурук» диэн төбөлөөх уонна 42 киһи илии баттааһыннаах суругу ааҕан, илдьиритэн баран, оройуон Коммунистическай партиятын бюрота бу аһаҕас сурукка суруллубут «ситиһиилэри» аҥардас Б.Н. Попов туруорсуутунан быһаарыллан эрэллэрин курдук суруллубутун сыыһанан ааҕабыт.
Тоҕо?
Бастатан туран, бу манна суруллубут боппуруостар барылара өрдөөҕүттэн көтөҕүллэн, туруорсуллан, урут үлэлээн ааспыт оройуон хас да көлүөнэ салайааччылара уонна республика, оройуон таһымнаах депутааттара ырааҕы өтө көрөннөр туруорсубут туруорсууларын, бу саҥа үлэлээн эрэр киһи үтүөтүн-өҥөтүн курдук аҥардастыы көрдөрө сатааһыны улахан алҕаһынан ааҕабыт.
Иккиһинэн. Бу аһаҕас сурукка суруллубут сурук быыһыгар федеральнай, республиканскай суолталаах улахан боппуруостар, кинилэр үбүлээһиннэрэ уонна туолуутун хонтуруола республиканскай, федеральнай таһымнаах үрдүкү тэрилтэлэринэн барара кимиэхэ барыта чуолкай. Холобурун эттэххэ, Дьаархаҥҥа тутуллуох курдук буолбут Марха өрүһүн муостата, самолет түһэр-тахсар балаһата, үрдүкү күүрүүлээх линия, хаарбах дьиэлэртэн көһөрүү программаҕа киирбит уопсай дьиэлэр тутуулара. Ону эрийэ тутан, бу маны Б.Н. Попов өҥөтүн, дьаһалын курдук дьону-сэргэни итэҕэтэ сатааһыны биһиги олох сыыһа быһыынан ааҕабыт.
Үсүһүнэн. Оройуон урукку салайааччыларын, депутааттарын көмөлөрүнэн Ньурба оройуонугар: Маалыкайга, Антоновкаҕа, Онөлдьөҕө, Мархаҕа, Дьаархаҥҥа, Ньурба куорат иһигэр үс саҥа таас оскуолалар, маны таһынан Чаппандаҕа икки этээстээх кулууп, куорат иһигэр үс этээстээх поликлиника, сытар балыыһа о.д.а. атын элбэх тутуулар барбыттарын умнуо суохтаахпыт (хомойуох иһин, билигин үлэлии олорор баһылык түөрт сыл устата маннык улахан хамсааһыннары оҥорбото).
Төрдүһүнэн. Оройуон баһылыгын быыбара буолара өссө даҕаны балтараа сыл баар. Ол иннинэ оройуон дьаһалтатыгар саҥа үлэлээн эрэр Антонов А.С., оройуон кырдьаҕастарын Сэбиэтин бэрэссэдээтэлэ Федоров К.В. уонна билигин пенсиятыгар олорор Павлов В.Д. буоланнар, быыбардааччылары үтэн-анньан, оройуон кырдьаҕастарын, бэтэрээннэрин кытта сөбүлэһиитэ суох, аҕыйах тылынан кэпсээбитэ буолан баран, эрдэттэн былааннаммыт биирдиилээн дьоҥҥо илии баттааһыны ыалларынан кэрийэ сылдьан тэрийбиттэрин сыыһанан ааҕабыт.
Бэсиһинэн. Хомойуох иһин, маннык провокацияҕа биһиги оройуоммут сорох хомунньуустара эмиэ киирэн биэрбиттэр. Райком бюрота бу дьону кытта аһаҕастык кэпсэтэлээн, быһаарыыларын истэн баран, кинилэр персональнай эппиэтинэстэрин көрдө. Уонна бюро биир санаанан кинилэр бэйэлэрин тус илии баттааһыннарынан атын партияны өйөөбүттэрин курдук көрөн, политическай алҕаһы таһаарбыттарын билиммиттэрин учуоттаан, биир коммунист партияттан таһаарылынна, атын алта киһиэхэ кытаанах партийнай сэрэтии оҥоһулунна.