Сахабыт Сиригэр эргиллэр эбит буоллахха, былаас ыытар экономическай политикатын содулугар, саха дьонун төрүт дьарыга- тыа хаһаайыстыбата, өтөрүнэн өрүттүбэт гына, бүтэһиктээхтик үрэлиннэ. Сыспай сиэллээҕи, хороҕор муостааҕы оҥостон туран эстилэр. Ходуһалар хааллылар, сэтиэнэҕинэн саба үүннүлэр.
Оптимизация диэни хабырдык ыытаннар, тыа сиригэр эмтэнии дьиэлэрэ, дьоҕус оскуолалар сабылыннылар. Үлэтэ суохтар, ытыс тоһуйааччылар олус элбээтилэр. Иэс тэтэрээттэр нөҥүө астарын булунааччылар баар буоллулар. Арыгылааһын күүскэ тэнийдэ. Буруйу оҥоруу үксээтэ. Үөрэнии, эмтэнии төлөбүрдээх буолуута тэтимирдэ. Ыарахан ыарыһахтарга государство өттүттэн күттүөннээх көмө оҥоһуллубатыттан, кинилэргэ үбү дьон бэйэтинэн хомуйар практиката олохпут сорҕото буолла. Араас сылтаҕынан ыстараабынан кыһарыйыы, куттааһын күүскэ тэнийдэ. Сирбит баайын аҥардастыы хостооһун, хоро таһыы түмүгэр айылҕабыт өтөрүнэн оһуруммат гына кэхтэн эрэр, экологиябыт олуһун диэн айгыраата.
Билиҥҥи былаас ыытар политикатын содулугар Сэбиэскэй кэмҥэ ытыктабылы олоччу суох оҥордулар. Оччотооҕу кэми, Ленини, Сталины баһааҕырдыы хаһааҥҥытааҕар даҕаны күүһүрдэ. Пионерия, комсомол күннэрин, Улуу Өктөөбү билиммэт буоллулар. Бу бэлиэ түгэннэри ТВ, радиоҕа, хаһыакка сырдаппаттар. Оннооҕор Өрөгөйдөөх Кыайыы күнүгэр, дойдубут киин куоратыгар Москваҕа, Ленин мавзолейын кистээн, эргиччи фанеранан саайаллар. Дьэ бу сиэргэ баппат олус куһаҕан көстүү. Билиҥҥи былаас аҥардас бу быһыытын иһин киниэхэ ытыктабыл суох. Кэлэйэбит эрэ буоллаҕа эбээт. Үөрэх программатыттан сэбиэскэй кэми, оччотооҕу дьон үтүөтүн, дойдуларыгар бэриниилээхтэрин, хорсуннарын, үлэһиттэрин бигэргэтэр айымнылары олоччу ылан кэбистилэр. Үүнэр көлүөнэни сырдыкка-кэрэҕэ уһуйар хоһооннору, кэпсээннэри аны оскуолаҕа аахпат буоллулар.
Онон кулун тутар ыйга ыытыллар Россия президенин талыыга, социализм тутулун эргитэр бигэ санаалаах, КПРФ партия туруорбут кандидатыгар Николай Харитоновка куоластыаҕын! Кини экономическай киэн билиилээх, производстваны, тыа хаһаайыстыбатын үчүгэйдик быһаарсар, дойдуну салайарга толору бэлэмнээх киһи буолар. ,,СВО кэнниттэн социализмы тутуохпут,, диэн этиитэ инникигэ эрэлбитин күүһүрдэр. Харитонов Госдумаҕа Дальнай Восток уонна Артика комитетын уһун кэмҥэ салайан таһаарыылаахтык үлэлиир. 92 олус суолталаах дьаһаллар олоххо киирэллэрин туруорсубут депутат буолар.
*Кулун тутар 15-17 күннэригэр Россия президенин быыбарыгар Николай Харитоновка куоластаатахпытына, кини биһиги итэҕэлбитин ылар түгэнигэр олохпут укулаата тосту уларыйыаҕа. Социализм суолун тутуһуохпут. Сайдыыбыт түстэниэҕэ.* 🚩🚩🚩
Мэхээлэ