Дмитрий партияҕа аҕыйах сыллааҕыта киирбитэ гынан баран, тута дьоҥҥо сөбүлэппитэ. “Дима Петров — үчүгэй киһи! Горнай коммунистара, дьэ, абыраннылар”, — диэн Саха сирин коммунистарын салайааччыта Вячеслав Куличкин мунньахтарга этэрин мэлдьи истэбин. КПРФ Горнайдааҕы райкомун бастакы секретара Любовь Мордовскайаны кытта кэпсэттэхпинэ, «Дмитрийдыын сүбэлэһиэм», «Дима оҥорбута», «Уолбут тэрийбитэ», — диэн хайҕаан тахсар.
“Госснаб” диэн Саха сирин олохтоохторун Сэбиэскэй кэмҥэ араас таабаарынан хааччыйар тэрилтэҕэ 49 сыл (экономистан саҕалаан генеральнай директорга тиийэ) үлэлээбит РСФСР үтүөлээх экономиһа Анна Кондратьева: “Хата бу олохтоох тыллаах-өстөөх, тэрийэр дьоҕурдаах кыахтаах эдэр райком секретардаммыппыт”, — диэн дьоҥҥо үөрэ-көтө кэпсээбитигэр, “Хайдах киһи барыта эрэ хайҕыыр киһитэ эбитэ буолла”, — диэн испэр муодарҕыы санаабытым.
Бу дьыл бэс ыйын 4 күнүгэр Бэрдьигэстээххэ Ленин уонна Сталин пааматынньыктарын арыйыы үөрүүлээх миитинигэр реском бастакы уонна иккис секретардара Вячеслав Куличкины, Иннокентий Васильевы, актыыбынай бэтэрээннэр Федора Аммосованы уонна Альбина Иванованы кытта бара сылдьан Дмитрий Петровтыын сирэй көрсөн билсибитим. Кини сахаҕа уһун дьылыгар уҥуохтаах, ис киирбэх дьүһүннээх, кыайыгас-хотугас, эйэҕэс-сайаҕас эдэр киһи буолан биэрдэ.
Ленин уонна Сталин дьоһуннаах паамытынньыктарын арыйыы миитинигэр тыл эппит дьон Горнайдааҕы райком иккис секретарыгар Дмитрий Петровка махтаммыттара. Тоҕо? Бэрдьигэстээх олохтоохторо Ленин уонна Сталин пааматынньыктарын постаменнарын оҥорууга харчынан көмөлөһүөх буолан баран, «умнан» кэбиспит урбаанньыттары өр күүтэ сатаабыттар эбит.
Онтон биирдэ партийнай мунньахха Дмитрий Петров: “Аны күүппэппит. Бэйэбит да оҥоруохпут”, — диэбит. Уонна уһата-кэҥэтэ барбакка, табаарыһа, СВО кыттыылааҕа Грант Ивановы кытта сүрүн үлэтин быыһыгар, үксүн хара киэһээҥҥэ диэри үлэлээн, сүүрэн-көтөн, ааҕан-суоттаан, наадалаах матырыйааллары булан, постаменнара өр сылларга бигэ-таҕа турарын курдук өйдөрүн-санааларын ууран туран, харыларын күүһүнэн оҥорон-тутан кэбиспиттэр.
Владимир Ильич Ленин уонна Иосиф Виссарионович Сталин бэртээхэй пааматынньыктара туруоруллан, улуу дьон ааттара “Советская Россия”, “Коммунист” хаһыаттар, KPRF.ru, SakhaKPRF.ry сайтар уо.д.а. иһитиннэрэр-биллэрэр сириэстибэлэргэ сырдатыллан аан дойдуга, Россияҕа уонна өрөспүүбүлүкэҕэ киэҥник иһиллибитэ. Араас омук өйдөөх, сайдыылаах дьоно бука бары үөрбүттэрэ-көппүттэрэ, ис сүрэхтэриттэн эҕэрдэлээбиттэрэ.
Үөһээ Бүлүүгэ улааппыт, киһи-хара буолбут Дмитрий Петров Бэрдьигэстээххэ ыал буолан олорбута номнуо 16 сыл буолла. Үрдүк үөрэхтээх. Манна “Сомоҕо” диэн тэрилтэни (хааччахтаммыт эппиэтинэстээх уопсастыба) салайар. Бэрдьигэстээх ыраас, тупсаҕай оҥоһуулаах сэлиэнньэ быһыытынан биллэр — бу Дмитрий Дмитриевич сыралаах үлэтин түмүгэ. КПРФ Горнайдааҕы райкомун иккис секретарынан талыллан үлэлиир, улуус Мунньаҕын көхтөөх үлэлээх депутата.
Дмитрий Петров элбэх оҕолоох үтүө-мааны ыалга төрөөбүт буолан, хара үлэҕэ кыра эрдэҕиттэн эриллэ улааппыта. Билигин бэйэтэ элбэх оҕолоох ыал аҕа баһылыга. Онон Саха сирин олохтоохторун кыһалҕаларын этинэн-хаанынан билэр. Кини Ил Түмэҥҥэ боростуой дьон интэриэһин күүстээхтик туруулаһар, кырдьыгы уот харахха этэр, чиэһинэй депутат буолуоҕа диэн өрөспүүбүлүкэ коммунистара бигэ эрэллээхпит.
Соторутааҕыта Госдума коммунист-депутата, КПРФ Иркутскай уобаластааҕы кэмитиэтин бастакы секретара Сергей Левченко Саха сиригэр кэлэ сылдьан Россияҕа сыл ахсын саҥа 45 долларовай миллиардер эбиллэрин туһунан эппитэ. Санаан көрүҥ, оччоҕо сэриигэ улахан харчы хамсыыр буоллаҕына, аан дойду үрдүнэн төһө элбэх саҥа сытыйа байбыт олигарх эбиллэрэ буолла?!
Олигархтар СВО-га биир кэппиэйкэни биэрбэттэрин, кинилэр оҕолоро тас дойдуга үөрэнэллэрин, олороллорун бука бары билэҕит. Оттон боростуой дьон оҕолоро СВО-ҕа Ийэ дойдуларын көмүскүүллэр. Бронежилеттары, массыыналары, дроннары, аһы-таҥаһы, харчыны-үбү уо.д.а. эмиэ кыра-хара нэһилиэнньэ хомуйар.
Былаас туох диэбитинэн сылдьар, баай дьону өйүүр “Биир ньыгыл Россия” (единоростар) генерал-депутаттара Ил Түмэҥҥэ олус элбэх. Ол иһин кинилэр кыра-хара дьон кыһалҕаларыттан туора тураллар, өйдөрө-санаалара биһигиттэн олох атын. Кинилэр бастатан туран бэйэлэрин эрэ иннилэрин көрүнэллэрэ чуолкай. Онон коммунист-депутаттар ахсааннарын элбэтэр туһугар бу дьыл балаҕан ыйын 20 күнүгэр боччумнаах, киэҥ толкуйдаах эдэр киһиэхэ Дмитрий Петровка куоластааҥ! Коммунистарга куоластаабатахха, дойдубутун ыһыллыы-тоҕуллуу эрэ буолбакка, эстии күүтэр диэн элбэх өйдөөх дьон мээнэҕэ эппэт.
— Вячеслав Куличкин, Айаан Васильев, Дмитрий Петров — олус улахан эппиэттээх үлэҕэ сылдьар уолаттар эбиккит. Тустаах үлэҕитигэр уопуттаах дьон буоларгыт тылгытыттан-өскүтүттэн да биллэ сылдьар. Сахабыт сирин инники сайдыытын торумнарын, кини салайар кадрдарын, олохтоох дьонун-сэргэтин кыһалҕаларын, үлэни хамнаһы да толору билэҕит. Онон депутатынан таллахтарына, норуот дьиҥ ытыктабылын ылбыт депутаттарыгар тиийэ үүнүөххүт диэн бүк эрэнэбин, — диэн олоҕун 60 сылын оҕону үөрэтиигэ уонна иитиигэ анаабыт педагогическай үлэ бэтэрээнэ, Үөһээ Бүлүү оройуоннааҕы Сэбиэтин бэрэссэдээтэлин солбуйааччынан үлэлээбит ытык кырдьаҕас Ульяна Тимофеева уолаттарбытыгар туһаайан, буолаары турар быыбардарга ситиһиилэри истиҥ-иһирэх тылларынан баҕарбыта истэргэ олус үчүгэй.
Мин санаабар, реском да, райкомнар да, горкомнар да үлэһиттэрэ уонна биирдиилээн коммунистар хаһааҥҥытааҕар да сомоҕолоһон, бэйэ-бэйэни өйөһөн, өйдөһөн үлэлээтилэр. Бу биһиги партиябыт ыытар үлэтигэр-хамнаһыгар төһүү күүс буолуо диэн эрэнэбин.
— Мин КПРФ-ка киирбитим олус да учугэй эбит. Урут мин бары боппуруостары бэйэм быһаара сатыырым. Миэхэ ким да көмөлөспөт этэ. Партияҕа киирбиппэр, киһи барыта саба түһэн көмөлөһө, өйдүү-өйүү сатыыр, — диир депутакка кандидат Дмитрий Дмитриевич. — КПРФ Киин Кэмитиэтин иһинэн үлэлиир политическай үөрэх киинигэр үөрэммитим эмиэ элбэҕи биэрдэ.
Түгэнинэн туһанан, Үөһээ Бүлүү уонна Горнай улуустарын быыбардааччыларыттан Дмитрий Петровы буолаары турар быыбардарга өйөөҥ, киниэхэ куоластааҥ диэн ыҥырабын.
БЫЫБАРДААЧЧЫ! ЭН КУОЛАҺЫҤ БАРЫТЫН БЫҺААРАР!
Тугу да кыайан уларытар кыахпыт суох диир дьоҥҥо итэҕэйимэҥ. Биһиги олохпутун бэйэбит эрэ уларытар кыахтаахпыт.
Галина МОХНАЧЕВСКАЯ