Ардахтаан, суол-иис бадарааннанан, кыттааччыларга ыарахан соҕус буолла. Сайын сөбүлээн сөтүөлүүр сирбит кумахтаах кытылыгар сарсыарда эрдэттэн волейбол сетката ыйанна, мотоцикл сүүрдэр трассата бэлиэтэннэ. Икки чаастан болдьоммут тэрээһин үөрүүлээх аhыллыытыгар Клавдия Иванова, 54 сыл партийнай стажтаах С.П. Васильев, РФКП Сунтаардааҕы райкомун бастакы секретара Трофим Павлов, ветеран-коммунист В.С. Иванова тыл эттилэр. Комсомол эдэр ыччаты иитиигэ суолтатын кэпсээтилэр, оҕолор олоххо активнай позициялаах буолалларыгар баҕардылар. Р.А. Гуляева кэрэ куолаһынан ыллаан, аһыллыыны киэргэттэ.
Күүтүүлээх күрэхтэр саҕаланнылар. Бастакынан “тимир аттар” — мокиктар, мотоцикллар — түһүннүлэр, бу күрэххэ Дьокуускай, Сунтаар оскуолаларын үөрэнээччилэрэ кыттыыны ыллылар. Күрэххэ ГИБДД үлэһиттэрэ судьуйалаатылар. Кумахтаах суол мотоциклистарга моһоллордоох да буоллар, трассаны бары этэҥҥэ туораатылар. Кыайыылаахтар кубогынан, мэтээлинэн наҕараадаланнылар, сэмэй бэлэхтэри туттулар.
Иккис түһүмэх — пляжка волейбол. Биэстии киһилээх “МотогонщиктарЦ уонна “Молодая гвардия” командалар эрийсиилээх киирсиилэрэ “гвардиялар” кыайыыларынан түмүктэннэ. Кыттааччылар этэллэринэн, эдэрдии эрчими саастаах опыт баһыйда.
Итии чэй, минньигэс шашлык кыттааччыларга сэниэ киллэрдэ. Ол кэннэ “Ыраас кытыл” акция ыытылынна, кыттааччылар пляж территориятын ыраастаатылар. Сэргэх, сонун тэрээһин урукку комсомольскай ырыаларынан түмүктэннэ, бары үөрэ-көтө тула түмсэн ыллаан дьиэрэттилэр. Сылдьыбыт дьон дуоһуйа сынньанан, күрэхтэһэн, ыллаан-туойан астынан тарҕастылар. Бу курдук эдэр ыччакка аналлаах тэрээһиннэр өссө да буола туралларыгар баҕа санааларын эттилэр, тэрийээччилэргэ махтаннылар.
Биир дойдулаахпыт, поэт Леонид Попов хоһоонугар этэн турар:
Хаар баттаан, кырдьар да үйэҕэ,
Өрүүтүн тэбиэхтин биһиэхэ
Комсомол төлөннөөх сүрэҕэ...
Бу сайыҥҥы сайаҕас күн саастаах дьон эргиллибэт комсомол сылларын санаатылар. Эрчимнээх эдэр саас уота умуллубатыгар эрэллээх буоллулар.
РФКП Сунтаардааҕы райкомун пресс-киинэ.