Итинник үөрэнэн Егор Иванович Дьокуускайдааҕы педагогическай институту бүтэрэн, математик идэтин ылан, Сыымах Герой Попов аатынан оскуолатыгар үлэтин саҕалыыр. Үлэлии сылдьан олоҕун аргыһын Мария Федоровналыын ыал буолан, Егор Иванович дойдутугар Хорообукка олохсуйаллар. Оскуолаҕа үлэлии сырыттаҕына, эдэр эрчимнээх киһини, оройуон салалтата Мэлдьэхси нэһилиэгин исполкомун председателынан 1971 сыллаахха аныыллар. Итинтэн салҕыы Егор Иванович Хорообут отделениятын управляющайынан үтүө суобастаахтык тоҕус сыл үлэлиир. Кини 17 сыл устатыгар нэһилиэк сэбиэтин председателынан, отделение управляющайынан үлэлиир кэмигэр Хорообут киһи билбэт гына улаатар. Элбэх саҥа тутуулар дьэндэһэллэр. Ол курдук, 1971 сыллаахха үйэ тухары аан бастаан Суола үрэҕин туоруур муоста тутуллар. 1973 сыллааха 200 миэстэлээх саҥа типовой культура дьиэтэ, 1974 сыллаахха 200 төбөҕө ыанньык уонна 150 төбөҕө анаан ыччат сүөһүгэ хотоннор тутуллан үлэҕэ киирэллэр. 1974-1976 сылларга үс сайылык фермалар 600 төбөҕө автодойкалаах хотоннор оҥоһуллан үлэҕэ киирэллэр. 1977 сыллаахха 400 төбөҕө толору механизациялаах кыстык ферма, 20 миэстэлээх гараж, 50 миэстэлээх детсад, элбэх точкалаах ма5аһыын тутуллан үлэҕэ киирэллэр.
Хонуу үлэтигэр Хорообут мелиоративный системата толору бетоҥҥа кубулутуллар, Төҥүлүлүүр суолтан Хорообукка дылы 13 километр усталаах суол оҥоһуллар, 300 гектар тыа солонон бааһына оҥоһуллар. Элбэх ыаллар саҥа дьиэ туттан киирэллэр, нэһилиэнньэ ахсаана 1250 киһиэхэ тиийэр. Хорообутка үлэ күөстүү оргуйар. Нэһилэинньэ олоҕо-дьаһаҕа тупсан сыллата производство көрдөрүүлэрэ тупсан, улаатан иһэр.
Хорообутка кыстыыр ынах сүөһүтүн ахсаана 2400 төбөҕө тиийэр. Итинтэн ремонтнай эдэр сүөһүлэри - 120, тиҥэһэлэри киллэрэн туран ыанар ынаҕа 720 төбөҕө тиийэр, сылгытын ахсаана 750 төбө, онтон биэтэ 407 төбөҕө тиийэр. Отделение үүтү, эти оҥорууга оройуҥҥа бастыыр, ону таһынан оттооһуҥҥа туорахтаах культураны үүннэриигэ, сиилэһи угууга, АВМ (от мээккэтин) бэлэмнээһиҥҥэ эмиэ бастакы кэккэҕэ тахсар. Ол түмүгэр, үлэ араас суол көрүҥнэригэр бастаан Хорообут отделенията, алтаҕа тиийэ көһөрүллэ сылдьар “Кыһыл знамялары” илдьэ хаалар чиэскэ тиксэр.
Сельсовет председателя – партийнай тэрилтэ сэкиритээрэ, отделение управляющайа, партком чилиэнэ, дирекция советын чилиэнэ – ити үлүгэрдээх элбэх тутуу барарыгар, сүүрэригэр, салайарыгар, хонтуруоллууругар төһөлөөх элбэх кирза саппыкыны алдьаппыта буолуой?! Биһиги билэбит, Егор Иванович сабыс саҥа “урал” уонна “планета” мотоцикллары алдьатан, туһата суох оҥортолообутун, дьиэтин-уотун, бэйэтин хаһаайыстыбатын көрүммэтин. Киниэхэ мэлдьи – үлэтэ, дэлэҕэ даҕаны биир отделенияҕа биир сыл үс мөлүйүөннээх тутуу ыытыллыа дуо? Ол барыта отделение управляющайа Егор Иванович сиэрдээх, сыралаах үлэтин көрдөрөр.
Мэлдьэхси сэбиэтин председателинэн кини үлэлиир эрдэҕинэ, билиҥҥи Мэлдьэхси уонна Хорообут биир нэһилиэк этилэр, ону таһынан Харба Атах производственнай учаастак быһыытынан киирэрэ.
Сельсовет председателя, отделение управляющайа – эргиччи 17 сыл устата Хорообукка бастакы салайааччынан сылдьыбыт Егор Иванович пенсияҕа тахсан баран, Хорообут кырдьаҕастарын сэбиэтин председателинэн үлэлиир. Онно оройуон таһаарар “Память” кинигэҕэ Аан дойду сэриитигэр баран өлбүт, төннөн кэлбит Суола уонна Хорообут нэһилиэктэрин буойуттарын үйэтитиигэ сыралаһан үлэлиир, тугунан да сууйан сотуллубат улахан дьыаланы оҥорор.
Партийнай билиэтин өрө тутан, сүрэҕин төлөнүн бүтүннүү биэрэн туран үлэлээбит, 61 сыл партийнай ыстаастаах хомуньуус, ол иһигэр отучча сыл партийнай тэрилтэ сэкиритээринэн үлэлээбит, ытык кырдьаҕас Егор Иванович Птицын, олоҕун аргыһынаан Мария Федоровналыын 60 сыл бииргэ олорбуттарын 2019 сыллаахха Хорообутка ыһыах күн сиэннэрэ, оҕолоро түмсэн бэлиэтээбиттэрэ. Дьокуускайга киллэрэн, куорат кэрэ-мааны миэстэлэрин “лимузин” массыынаҕа тиэйэ сылдьан сиэннэрэ, оҕолоро көрдөрбүттэрин, олус астыммытын үөрэн-көтөн олорон, Мария Федоровналыын бэйэ-бэйэлэрин ситэрсэн биэрэ-биэрэ киирбит ыалдьыттарга кэпсиирэ.
Егор Иванович эдэр сылдьан атаҕар чэпчэки этэ, кини хаамарын сөбүлүүрэ. Хорообукка куобах элбэх эрдэҕинэ, куобах күрэҕин салайара, кынакка сылдьан нөҥүө кынакка күрэх хайдах баран иһэрин бэрибиэркэлээн барара. Сааһыран, 80-тан тахсан баран, велосипедынан канистрга бензин, солярка ыла 33 килэмиэтирдээх сиргэ Майаҕа, баран кэлэрэ. Бастайаанна велосипедынан сылдьан отоннуура. Дьиэтигэр тулуйан-тэһийэн олорбот, тугу эрэ булан үлэлии сылдьар этэ.
Кэргэнэ Мария Федоровна 87-гэр сылдьар, Егор Иванович 90 сылдьар сүөһүлэрин эспэтэхтэрэ, кыһынын ООО “Хорообут “ тэрилтэ5э көрдөрө-көрдөрө, саас буолла да бэйэлэрэ ынахтарын ыан үүт, суорат аһылыктарын сиэннэрин, хос сиэннэрин хааччыйан үөрэ-көтө олорбуттара...
Егор Иванович тиһэх күнүгэр дылы Российскай Федерация коммунистическай партиятын эрэллээх саллаата, «Партийная доблесть» орден кавалера.
Егор Иванович 2020 сыл тохсунньу 13 күнүгэр 90 сааһын туолаары сылдьан, 2019 сыл алтынньы 19 күнүгэр эмискэ орто дойдуттан баран биһигини соһутта, улаханнык хомотто!!!
Ахтыыны оҥордум: Андреев Александр Михайлович - Арассыыйа бочуоттаах бэтэрээнэ, Арассыыйскай Федерация коммунистическай партиятын бэтэрээнэ, Мэҥэ-Хаҥалас улууһун, Хорообут нэһилиэгин бочуоттаах олохтооҕо, Мэлдьэхси нэһилиэгин «Ытык Тааһын» хаһаайына, Саха сирин тыатын хаһаайыстыбатын бэтэрээнэ, Тыыл, Үлэ бэтэрээнэ.
Сэтинньи 14 күнэ 2019 с.