Российскай Федерация Коммунистичекскай партиятын рескома уонна партия Дьокуускай куораттааҕы комитета Строительнай уокурук салайааччытын Савва Михайловы Дьокуускай куорат баһылыгын дуоһунаһыгар кандидатынан туруорбуттарын саамай сөптөөх быһаарыы дии саныыбын.
РФКП Саха сиринээҕи комитета икки тыһыынча сыллар саҥаларыгар мэрия дьиэтин алтыс этаһыгар иккиэйэх хоско кыбыллан олороро. Коммунистары ыгыы-түүрүү кэмигэр бэҕэһээ оскуоланы бүтэрбит Савва Михайлов табаарыһынаан Вася Филипповтыын: “Биһиги Коммунистичекай партия идеяларын сөбүлүүбүт, өйүүбүт, онон кини кэккэтигэр киирэммит норуот интэриэһин көмүскүүр охсуһууга кыттыа этибит», — диэбиттэрин биһиги, 90-с сылларга Советскай Союз ыһыллыытын утарсыбыт коммунистар, бары үөрэ-долгуйа истибиппит. Ити бириэмэҕэ Саввалаах Васяны кытта Вячеслав Куличкин, Айаан Васильев, Андрей Данилов, Дмитрий Шарипов уо.д.а. курдук эдэр чаҕылхай дьон эмиэ партия кэккэтигэр киирэннэр, үлэ-үөрэх, бэйэ-бэйэҕэ чиэһинэй, ыраас-сырдык сыһыан кытаанах оскуолатын ааспыттара.
Бүгүн Василий Филиппов — Компартия Бүлүү оройуонунааҕы райкомун бастакы секретара, райсовет бэрэссэдээтэлин солбуйааччы, Вячеслав Куличкин — РФКП Киин Комитетын чилиэнигэр кандидат, РФКП Саха сиринээҕи комитетын иккис секретара, Айаан Васильев — Дьокуускай куорат 26 №-дээх оскуолатын директора, Гордума депутата, Андрей Данилов — политолог, Дмитрий Шарипов — партия Дьокуускай куораттааҕы комитетын бастакы секретара. Итини мин мээнэҕэ эппэтим. Виталий Обедин, Евгений Григорьев биһиги уолаттарбыт курдук комсомол уонна партия курдук кытаанах оскуоланы ааспыттара буоллар, баҕар, салайааччы быһыытынан буһуо-хатыа этилэр. Евгений Григорьев республикатыгар баара-суоҕа аҕыйах сыл үлэлээбит эбит. 2017 сыллаахха Москваттан төннүбүт.
Биһиги Саввабыт олох эдэр сааһыттан бэйэтин айаҕын ииттэн араас хара үлэҕэ үлэлии-үлэлии сылдьан үөрэммитэ, эбиитин общественнай үлэҕэ эриллибитэ-мускуллубута. Саха сирин комсомолун бастакы секретарынан үлэлиир кэмигэр студеннар комсомольскай тутар этэрээттэрин тэрийэн, өҥүрүк куйааска, кумаар-бырдах быыһынан хара тыаҕа мас кэрдэн газ ситимэ Бүлүү улууһугар киирэригэр байыастарын кытта күүскэ үлэлээбитэ-хамсаабыта.
Маны таһынан Савва Михайлов ситэриилээх былаас араас көрүҥнэригэр 14 сыл үлэлээн кэллэ уонна чиэһинэй буолууну, дьон-сэргэ кыһалҕатын сөптөөхтүк быһаарары ситиһэ, олохтуу сатаата. Кини коммунист буоларын хаһан да кистээбэт, кыбыстыбат.
Билигиҥҥи буржуазия былааһа коммунист Савва Михайлов таһыччы кыахтаах, сатабыллаах үлэлээх буолан кыайан туоратар кыаҕыа суох. Туох да кистэлэҥэ суох былаас үрдүкү салалтата хайа эрэ үлэһит коммунист буоларын иһиттэҕинэ, кэлин отут сылтан бэттэх кинини араастаан баһааҕырда, түһэрэ сатыыр, үрдүкү дуоһунастарга чугаһаппат сыаллаах. Салайааччы быһыытынан чаҕылхай хаачыстыбалардаах. Ол иһин Савва Ыччат министерствотыгар олус үчүгэйдик үлэлээбитэ. Итини таһынан республика Государственнай Мунньаҕын аппаратыгар үлэлээн киэҥ билиилээх үлэһит буоларын көрдөрбүтэ. Манна кинини Виктор Губарев ыҥырбыта уонна кырдьаҕас коммунистар Артур Алексеев, Александр Гаврильев, Андрей Кривошапкин, Галина Кокшарская, Николай Назаров, Филипп Охлопков уонна онтон да атыттар элбэххэ үөрэппиттэрэ-такайбыттара, билигин партия Дьокуускайдааҕы горкомун секретарыгар тиийэ үүннэрдилэр.
Манна даҕатан эттэххэ, Савва салайар үлэҕэ соһуччу кэлбэтэҕэ. Кини Бүлүү улууһугар администрация ыччакка, физкультура уонна спорт отделларыгар үлэлээбитэ. Онно кини тыа олоҕун кыһалҕаларын дьиҥнээхтик билэр. Мин санаабар, Савва Компартияҕа киирэн эппиэтинэстээх буолууга, былааннаахтык толкуйдаан үлэлииргэ, сыалын-соругун хайаан да тиһэҕэр тиэрдэргэ, дьону кытта сатаан кэпсэтэн уопсай тылы буларга үөрэммитэ. Онто суох араас өрүттээх эппиэттээх үлэҕэ өр кыайан үлэлээбэккин.
Савва кэлиҥҥи сылларга куорат биир саамай уустук, элбэх кыһалҕалаах уокуругун — Строительнайы салайан кэллэ. Биһиги, куорат олохтоохторо, билэрбитинэн уокурук салайааччылара өр олорботтор, дуоһунастан дуоһунаска көһө сылдьаллар, «үөһэттэн-алларааттан» ыгыыны-түүрүүнү тулуйбаттар. Онтон биһиги Саввабыт үлэтинэн-хамнаһынан, чиэһинэйинэн, кыһалҕаны сөпкө быһаарарынан уокурук олохтоохторугар убаастанар салайааччы.
Ол иһин Савва Михайлов өйө-санаата, билиитэ-көрүүтэ, сэмэй быһыыта, эппиэтинэстээх үлэһит буолара, дьоҥҥо-сэргэҕэ эйэҕэс сыһыана куораты салайарыгар, кэскилин торумнууругар күүс-көмө буолара саарбаҕа суох.
Анна КОНДРАТЬЕВА,
РСФСР үтүөлээх экономиһа,
“Сэрии сылын оҕолоро” хамсааһын
Саха сиринээҕи салаатын солбуйааччы бэрэссэдээтэлэ.